Hum se Ismail bin Abaan ne bayan kiya , kaha hum ko Abdullah bin Mubarak ne khabar di , unhein Yunus ne , unhein Zuhri ne , unhein Urwah ne aur in se Aisha razi Allahu anha ne ke Nabi Karim salla Allahu alaihi wasallam ne farmaya ”hamari wirasat nahi hoti hum jo kuch bhi chhorrein woh sadqa hai .“

Zuhri ne bayan kiya ke phir mein ne is hadees ka tazkira Urwah Bin Zubair se kiya to unhon ne kaha ke Malik Bin Aus ne ye riwayat tum se sahih bayan ki hai. Mein ne Nabi Kareem Sallallahu Alaihi Wasallam ki pak biwi Aisha Radi Allahu Anha se suna, unhon ne bayan kiya ke Nabi Kareem Sallallahu Alaihi Wasallam ki azwaj ne Usman Radi Allahu Anhu ko Abu Bakr Radi Allahu Anhu ke pas bheja aur un se darkhwast ki ke Allah Ta'ala ne jo faie apne Rasul Sallallahu Alaihi Wasallam ko di thi is mein se un ke hisse diye jayein, lekin mein ne unhein roka aur un se kaha tum Allah se nahi darti ke Aap Sallallahu Alaihi Wasallam ne khud nahi farmaya tha ke hamara tarka taqseem nahi hota? Hum jo kuch chor jayein wo sadqa hota hai. Aap Sallallahu Alaihi Wasallam ka ishara is irshad mein khud apni zaat ki taraf tha. Albatta Aal-e-Muhammad (Sallallahu Alaihi Wasallam) ko is jaidad mein se ta zindagi (un ki zaruriyat ke liye) milta rahe ga. Jab mein ne azwaj-e-mutahharat ko ye hadees sunayi to unhon ne bhi apna khayal badal diya. Urwah ne kaha ke yahi wo sadqa hai jis ka intizam pehle Ali Radi Allahu Anhu ke hath mein tha. Ali Radi Allahu Anhu ne Abbas Radi Allahu Anhu ko is ke intizam mein shareek nahi kiya tha balkey khud is ka intizam karte thay (aur jis tarah Nabi Kareem Sallallahu Alaihi Wasallam Abu Bakr Radi Allahu Anhu aur Umar Radi Allahu Anhu ne ise kharch kiya tha, isi tarah unhein masarif mein wo bhi kharch karte thay) is ke baad wo sadqa Hasan Bin Ali (Radi Allahu Anhuma) ke intizam in aa gaya tha. Phir Husain Bin Ali (Radi Allahu Anhuma) ke intizam mein raha. Phir Janab Ali Bin Husain aur Hasan Bin Hasan ke intizam mein aa gaya tha aur ye haq hai ke ye Rasul Allah Sallallahu Alaihi Wasallam ka sadqa tha
.