Hum se Muhammad bin Abdullah bin Hawshab ne byaan kiya , unhon ne kaha ke hum se Abdul Wahhab Thaqafi ne byaan kiya , unhon ne kaha ke mujh se Humayd Taweel ne Anas bin Malik razi Allahu anhu se byaan kiya , unhon ne kaha ke Nabi Karim salla Allahu alaihi wasallam ne farmaya , aye Bano Salama walo! kya tum apne qadmon ka sawab nahi chahte ?

Aur Ibn Abi Maryam ne byaan mein yeh zyada kaha hai ke mujhe Yahya bin Ayyub ne khabar di , kaha ke mujh se Humayd Taweel ne byaan kiya , kaha ke mujh se Anas bin Malik razi Allahu anhu ne byaan kiya ke Bano Salama walon ne yeh irada kiya ke apne makaan (jo masjid se door thay) chhor den aur Nabi Karim salla Allahu alaihi wasallam ke qareeb aa rahen . (taake bajamaat ke liye masjid Nabwi ka sawab haasil ho) lekin Nabi Karim salla Allahu alaihi wasallam ko Madinah ka ujaar dena bura maloom hua . Aap ne farmaya ke tum log apne qadmon ka sawab nahi chahte ? Mujahid ne kaha (Surah Yaseen mein) «wa aathaarahum» se qadam muraad hain . Yani zameen par chalne se paon ke nishanaat .

Hum se Muhammad Bin Salam Baikandi ne bayan kiya, kaha ke humein Marwan Bin Muawiyah Fazari ne khabar di, unhein Humaid Taweel ne khabar di aur un se Anas (Radi Allahu Anhu) ne bayan kiya ke Bano Salama ne chaha ke apne door wale makanat chor kar Masjid-e-Nabwi se kareeb iqamat ikhtiyar kar lein lekin Rasul Allah (Sallallahu Alaihi Wasallam) ne ye pasand na kiya ke Madinah ke kisi hissa se bhi rehaish tark ki jaye, Aap (Sallallahu Alaihi Wasallam) ne farmaya ke ae Bano Salama! tum apne qadmon ka sawab nahi chahte, chunanche Bano Salama ne (apni asli iqamat gah mein) rehaish baqi rakkhi
.