Hum se Umar bin Hafs bin Ghiyas ne bayan kiya , kaha mujh se mere walid ne bayan kiya , kaha hum se Aamash ne bayan kiya , kaha ke mujh se Shaqeeq ne bayan kiya , kaha ke hum Abdullah bin Masood razi Allahu anhu ka intizar kar rahe thay ke Yazid bin Muawiyah aaye . Hum ne kaha , tashreef rakhiye lekin unhon ne jawab diya ke nahi , main andar jaoon ga aur tumhare saath (Abdullah bin Masood razi Allahu anhu) ko bahar laoon ga . Agar woh na aaye to main hi tanha aa jaoon ga aur tumhare saath baithoon ga . Phir Abdullah bin Masood razi Allahu anhu bahar tashreef laaye aur woh Yazid bin Muawiyah ka hath pakre huay thay phir hamare samne khare huay kehne lage main jaan gaya tha ke tum yahan maujood ho . Pas main jo nikla to is wajah se ke main ne Nabi Karim salla Allahu alaihi wasallam ko dekha Aap muqarrara dinon mein hum ko waz farmaya karte thay , (fasila de kar) Aap ka matlab yeh hota tha ke kahin hum ukta na jayein .

Hum se Muhammed bin Yousuf ne bayan kiya, unhein Sufyan ne A’mash se khabar di, woh Abu Waail se riwayat karte hain, woh Abdullah bin Mas’ood Radhiallahu Anhu se ke Rasoolullah Sallallahu Alaihi Wasallam ne hamein naseehat farmaane ke liye kuch din muqarrar kar diye the is darr se ke kahin hum kabeedah khaatir na ho jaayen.

Hum se Uthman bin Abi Shaibah ne bayan kiya, un se Jareer ne Mansoor ke waaste se naql kiya, woh Abu Waail se riwayat karte hain ke Abdullah (Ibn-e-Mas’ood) Radhiallahu Anhu har Jume’raat ke din logon ko waaz sunaaya karte the. Ek aadmi ne un se kaha aye Abu Abdur Rahman! Main chaahta hun ke tum hamein har roz waaz sunaaya karo. Unhon ne farmaaya, to sun lo ke mujhe is amr se koi cheez maane’ hai to yeh ke main yeh baat pasand nahi karta ke kahin tum tang na ho jaao aur main waaz mein tumhaari fursat ka waqt talaash kiya karta hun jaisa ke Rasoolullah Sallallahu Alaihi Wasallam is khayaal se ke hum kabeedah khaatir na ho jaayen, waaz ke liye hamaare auqaat-e-fursat ka khayaal rakhte the.