Hum se Ali bin Abdullah ne bayan kiya, kaha hum se Sufyan ne, kaha hum se Yazid bin Khusaifah ne bayan kiya in se Busr bin Saeed aur in se Abu Saeed Khudri razi Allahu anhu ne bayan kiya ke main Ansar ki ek majlis mein tha ke Abu Musa razi Allahu anhu tashreef laaye jaise ghabraye huay hon. Unhon ne kaha ke main ne Umar razi Allahu anhu ke yahan teen martaba andar aane ki ijazat chahi lekin mujhe koi jawab nahi mila, is liye wapas chala aaya (Umar razi Allahu anhu ko maloom hua) to unhon ne daryaft kiya ke (andar aane mein) kya baat manay thi? Main ne kaha ke main ne teen martaba andar aane ki ijazat maangi aur jab mujhe koi jawab nahi mila to wapas chala gaya aur Rasool Allah salla Allahu alaihi wasallam ne farmaya hai ke jab tum mein se koi kisi se teen martaba ijazat chahe aur ijazat na mile to wapas chala jaana chahiye. Umar razi Allahu anhu ne kaha: wallah! Tumhein is hadees ki sehat ke liye koi gawah lana ho ga. (Abu Musa razi Allahu anhu ne majlis walon se poochha) kya tum mein koi aisa hai jis ne Nabi Karim salla Allahu alaihi wasallam se yeh hadees suni ho? Ubayy bin Kabb razi Allahu anhu ne kaha ke Allah ki qasam! Tumhare saath (is ki gawahi dene ke siwa) jama'at mein sab se kam-umr shakhs ke koi aur nahi khada ho ga. Abu Saeed ne kaha aur main hi jama'at ka woh sab se kam-umr aadmi tha main in ke saath uth khada ho gaya aur Umar razi Allahu anhu se kaha ke waqeyi Nabi Karim salla Allahu alaihi wasallam ne aisa farmaya hai. Aur Ibn Mubarak ne bayan kiya ke mujhko Sufyan bin Uyaynah ne khabar di, kaha mujh se Yazid bin Khusaifah ne bayan kiya, unhon ne Busr bin Saeed se, kaha main ne Abu Saeed razi Allahu anhu se suna phir yahi hadees naqal ki.

Hum se Muhammad Bin Salam ne bayan kiya, kaha ke hum ko Makhlad Bin Yazid ne khabar di, kaha ke humein Ibn Juraij ne khabar di, kaha ke mujhe Ata Bin Abi Rabah ne khabar di, unhein Ubaid Bin Umair ne ke Abu Musa Ashari (Radi Allahu Anhu) ne Umar Bin Khattab (Radi Allahu Anhu) se milne ki ijazat chahi lekin ijazat nahi mili. Ghaliban aap is waqt kaam mein mashghool thay. Is liye Abu Musa (Radi Allahu Anhu) wapas laut gaye. Phir Umar (Radi Allahu Anhu) farigh hue to farmaya kya mein ne Abdullah Bin Qais (Abu Musa Radi Allahu Anhu) ki awaz nahi suni thi. Unhein andar aane ki ijazat de do. Kaha gaya wo laut kar chale gaye. To Umar (Radi Allahu Anhu) ne unhein bula liya. Abu Musa (Radi Allahu Anhu) ne kaha ke humein isi ka hukm (Nabi Kareem Sallallahu Alaihi Wasallam se) tha (ke teen martaba ijazat chahne par agar andar jane ki ijazat na mile to wapas laut jana chahiye) is par Umar (Radi Allahu Anhu) ne farmaya, is hadees par koi gawah lao. Abu Musa (Radi Allahu Anhu) ansar ki majlis mein gaye aur un se is hadees ke mutaliq poocha (ke kya kisi ne usay Nabi Kareem Sallallahu Alaihi Wasallam se suna hai) in logon ne kaha ke is ki gawahi to tumhare sath wo de ga jo hum sab mein bahut hi kam umr hai. Wo Abu Saeed Khudri (Radi Allahu Anhu) ko apne sath le gaye. Umar (Radi Allahu Anhu) ne ye sun kar farmaya ke Nabi Kareem (Sallallahu Alaihi Wasallam) ka ek hukm mujh se poshida reh gaya. Afsos ke mujhe bazaron ki khareed-o-farokht ne mashghool rakkha. Aap ki murad tijarat se thi
.