Mujh se Muhammad bin Salam ne bayan kiya, kaha ke mujhe Makhlad bin Yazid ne khabar di, kaha ke mujhe Ibn Jurayj ne khabar di, kaha ke mujhe Ubaidullah bin Hafs ne khabar di, unhein Amr bin Nafi ne khabar di, unhein Abdullah bin Umar razi Allahu anhuma ke ghulam Nafi ne ke unhon ne Ibn Umar razi Allahu anhuma se suna, woh bayan karte thay ke main ne Rasool Allah salla Allahu alaihi wasallam se suna hai Aap ne «qaza-un» se mana farmaya, Ubaidullah kehte hain ke main ne Nafi se poochha ke «qaza-un» kya hai? Phir Ubaidullah ne hamain isharah se bataya ke Nafi ne kaha ke bache ka sar mundate waqt kuch yahan chhorr de aur kuch baal wahan chhorr de. (to usay «qaza-un» kehte hain) usay Ubaidullah ne peshani aur sar ke donon kinaron ki taraf isharah kar ke hamain is ki surat batayi. Ubaidullah ne is ki tafseer yun bayan ki yani peshani par kuch baal chhorr diye jayein aur sar ke donon konon par kuch baal chhorr diye jayein. Phir Ubaidullah se poochha gaya ke is mein larka aur larki donon ka ek hi hukm hai? Farmaya ke mujhe maloom nahi. Nafi ne sirf larke ka lafz kaha thu. Ubaidullah ne bayan kiya ke main ne Amr bin Nafi se dobara is ke mutalliq poochha to unhon ne kaha ke larke ki kan-pati ya gud-di par choti ke baal agar chhorr diye jayein to koi haraj nahi hai lekin «qaza-un» yeh hai ke peshani par baal chhorr diye jayein aur baqi sab mundwaye jayein isi tarah sar ke is jaanib mein aur is jaanib mein.

Hum se Muslim bin Ibrahim ne bayan kiya, unhon ne kaha hum se Abdullah bin Musanna bin Abdullah bin Anas bin Malik ne bayan kiya, unhon ne kaha hum se Abdullah bin Dinar ne bayan kiya aur in se Abdullah bin Umar razi Allahu anhuma ne bayan kiya ke Rasool Allah salla Allahu alaihi wasallam ne «qaza-un» se mana farmaya tha.