Hum se Sulayman bin Harb ne bayan kiya , unhon ne kaha hum se Shubah ne bayan kiya , in se Adi bin Sabit ne bayan kiya , in se Abu Hazim ne bayan kiya aur in se Abu Hurairah razi Allahu anhu ne ke ek sahab bahut zyada khana khaya karte thay , phir woh Islam laye to kam khane lage . Is ka zikr Rasool Allah salla Allahu alaihi wasallam se kiya gaya to Aap salla Allahu alaihi wasallam ne farmaya ke momin ek aant mein khata hai aur kafir saaton aanton mein khata hai .

Hum se Muhammad bin Bashar ne bayan kiya , hum se Abd-us-Samad bin Abd-ul-Waris ne bayan kiya , kaha hum se Shubah bin Hajjaj ne bayan kiya , in se Waqid bin Muhammad ne , in se Nafi ne bayan kiya ke Ibn Umar razi Allahu anhuma is waqt tak khana nahi khate thay , jab tak in ke saath khane ke liye koi miskeen na laya jata . Ek martaba main in ke saath khane ke liye ek shakhs ko laya ke us ne bahut zyada khana khaya . Baad mein Ibn Umar razi Allahu anhuma ne kaha ke aainda is shakhs ko meere saath khane ke liye na laana . Main ne Nabi Karim salla Allahu alaihi wasallam se suna hai ke momin ek aant mein khata hai aur kafir saat aanton mein khata hai .

Hum se Muhammad bin Salam ne bayan kiya , kaha hum ko Abdah bin Sulayman ne khabar di , unhein Ubaidullah Umri ne khabar di , unhein Nafi ne aur in se Ibn Umar razi Allahu anhuma ne bayan kiya ke Rasool Allah salla Allahu alaihi wasallam ne farmaya ke momin ek aant mein khata hai aur kafir ya munafiq (Abdah ne kaha ke) mujhe yaqeen nahi ke in mein se kis ke mutalliq Ubaidullah ne bayan kiya ke woh saaton aantein bhar leta hai aur Ibn Bukayr ne bayan kiya , in se Imam Malik ne bayan kiya , in se Nafi ne , in se Ibn Umar razi Allahu anhuma aur in se Nabi Karim salla Allahu alaihi wasallam ne isi hadees ki tarah bayan farmaya .

Hum se Ali bin Abdullah ne bayan kiya , unhon ne kaha hum se Sufyan bin Uyaynah ne bayan kiya , in se Amr bin Dinar ne ke Abu Naheek bare khane wale thay . In se Abdullah bin Umar razi Allahu anhuma ne kaha ke Rasool Allah salla Allahu alaihi wasallam ne farmaya hai ke kafir saaton aanton mein khata hai . Abu Naheek ne is par arz kiya ke main Allah aur us ke Rasool par iman rakhta hoon .

Hum se Ismail bin Abi Oways ne bayan kiya , unhon ne kaha ke mujh se Imam Malik ne bayan kiya , in se Abu al-Zinad ne , in se Aaraj ne aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne farmaya ke Musalman ek aant mein khata hai aur kafir saaton aanton mein khata hai .