Hum se Musa bin Ismail ne byaan kiya , kaha hum se Wuhaib ne byaan kiya , unhein Hisham ne khabar di , unhein un ke walid ne , unhein Zaynub bint Abi Salamah razi Allahu anha ne ke Umm Salamah razi Allahu anha ne byaan kiya ke main ne arz kiya: ya Rasool Allah! kiya mujhe Abu Salamah (in ke pehle shohar) ke larkon ke baare mein sawab mile ga agar main in par kharch karoon . Main unhein is muhtaji mein dekh nahi sakti , woh meere bete hi to hain . Nabi Karim salla Allahu alaihi wasallam ne farmaya ke haan , tumhein har is cheez ka sawab mile ga jo tum in par kharch karo gi .

Hum se Uthman bin Abi Shaiba ne byaan kiya ‘ kaha ke hum se Abdah ne ‘ un se Hisham ne byaan kiya ‘ un se un ke baap ne ‘ un se Zainab bint Umm Salamah ne ‘ un se Umm Salamah ne ‘ unhon ne kaha ke maine arz kiya ‘ Ya Rasool Allah! Agar main Abu Salamah (apne pehle khawand) ke beton par kharch karoon to durust hai ya nahi . Kyunke woh meri bhi aulaad hain . Aap salla Allahu alaihi wasallam ne farmaya ke haan in par kharch kar . To jo kuch bhi in par kharch kare gi is ka sawab tujh ko mile ga .

Hum se Abul Yaman ne byaan kiya ‘ kaha ke humein Shuayb ne khabar di ‘ kaha ke hum se Abul Zinad ne Aaraj se khabar di aur un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ne zakat wasool karne ka hukm diya . Phir Aap salla Allahu alaihi wasallam se kaha gaya ke Ibn Jamil aur Khalid bin Waleed aur Abbas bin Abdul Muttalib ne zakat dene se inkar kar diya hai . Is par Nabi Karim salla Allahu alaihi wasallam ne farmaya ke Ibn Jamil yeh shukr nahi karta ke kal tak woh faqeer tha . Phir Allah ne apne Rasool ki dua ki barkat se usay maaldar bana diya . Baaqi rahe Khalid ‘ to in par tum log zulm karte ho . Unhon ne to apni zarhein Allah Ta'ala ke raste mein waqf kar rakhi hain . Aur Abbas bin Abdul Muttalib ‘ to woh Rasool Allah salla Allahu alaihi wasallam ke chacha hain . Aur in ki zakat unhi par sadqa hai . Aur itna hi aur unhein meri taraf se dena hai . Is riwayat ki mutaba'at Abul Zinad ne apne walid se ki aur Ibn Ishaq ne Abul Zinad se yeh alfaaz byaan kiye . «hiya alaihi wa-mislaha ma'aha» (sadqa ke lafz ke baghair) aur Ibn Juraij ne kaha ke mujh se Aaraj se isi tarah yeh hadees byaan ki gayi .