Hum se Yusuf bin Rashid ne byaan kiya , kaha hum se Abu Usamah ne byaan kiya , in se Sufyan Sawri ne , kaha hum se Ayub aur Khalid ne donon ne byaan kiya , un se Abu Qulabah ne aur un se Anas razi Allahu anhu ne byaan kiya ke dastoor yeh ke jab koi shakhs pehle se shadi shuda biwi ki maujoodgi mein kisi kunwari aurat se shadi kare to is ke saath saat din tak qiyam kare aur phir baari muqarrar kare aur jab kisi kunwari biwi ki maujoodgi mein pehle se shadi shuda aurat se nikah kare to is ke saath teen din tak qiyam kare aur phir baari muqarrar kare . Abu Qulabah ne byaan kiya ke agar main chahoon to keh sakta hoon ke Anas razi Allahu anhu ne yeh hadees Nabi Karim salla Allahu alaihi wasallam se marfoo-an byaan ki hai . Aur Abdur Razzaq ne byaan kiya , unhein Sufyan ne khabar di , unhein Ayub aur Khalid ne kaha ke agar main chahoon to keh sakta hoon ke Anas razi Allahu anhu ne yeh hadees Nabi Karim salla Allahu alaihi wasallam se marfoo-an byaan ki hai .

Hum se Musaddad bin Musarhad ne byaan kiya , kaha hum se بشر bin Mufaddal ne , in se Khalid Hazza ne , un se Abu Qulabah ne byaan kiya aur un se Anas razi Allahu anhu ne (rawi Abu Qulabah ya Anas razi Allahu anhu ne) kaha ke agar main chahoon to keh sakta hoon ke Nabi Karim salla Allahu alaihi wasallam ne (aane wali hadees) irshad farmayi . Lekin byaan kiya ke dastoor yeh hai ke jab kunwari se shadi kare to is ke saath saat din tak rehna chahiye aur jab bewa se shadi kare to is ke saath teen din tak rehna chahiye .