Hum se Qutaybah bin Saeed ne byaan kiya , kaha ke hum se Sufyan ne byaan kiya , un se Aasim aur Abdah ne , un se Zirr bin Hubaysh ne byaan kiya ke unhon ne Ubayy bin Kabb razi Allahu anhu se Muawwizhatayn ke baare mein poocha to unhon ne byaan kiya ke yeh masla main ne bhi Rasool Allah salla Allahu alaihi wasallam se poocha thu . Nabi salla Allahu alaihi wasallam ne farmaya ke mujhe (Jibraeel alaihissalam) ki zabani kaha gaya hai ke yun kahiye ke «aoozhu bi-rabbil falaqi» al-kh main ne isi tarah kaha chunanche hum bhi wahi kehte hain jo Rasool Allah salla Allahu alaihi wasallam ne kaha .

Hum se Adam ne byaan kiya , kaha hum se Shubah ne byaan kiya , kaha hum se Qatadah ne byaan kiya , kaha ke main ne Zurarah bin Aufa se suna , woh Saad bin Hisham se byaan karte thay aur un se Aisha razi Allahu anha ne ke Nabi Karim salla Allahu alaihi wasallam ne farmaya ke is shakhs ki misal jo Quran parhta hai aur woh is ka hafiz bhi hai , mukarram aur naik likhne wale (farishton) jaisi hai aur jo shakhs Quran Majeed baar baar parhta hai . Phir bhi woh is ke liye dushwar hai to usay dugna sawab mile ga .

Hum se Ali bin Abdullah ne byaan kiya , un se Sufyan ne byaan kiya , un se Abdah bin Abi Lubabah ne byaan kiya , un se Zirr bin Hubaysh ne (Sufyan ne kaha) aur hum se Aasim ne bhi byaan kiya , un se Zirr ne byaan kiya ke main ne Ubayy bin Kabb razi Allahu anhu se poocha ke ya Aba al-Munzhir! Aap ke bhai Abdullah bin Masood razi Allahu anhu to yeh kehte hain ke Surah Muawwizhatayn Quran mein dakhil nahi hain . Ubayy bin Kabb ne kaha ke main ne Rasool Allah salla Allahu alaihi wasallam se is baat ko poocha tha . Nabi salla Allahu alaihi wasallam ne mujh se farmaya ke (Jibraeel alaihissalam ki zabani) mujh se yun kaha gaya ke aisa kahiye aur main ne kaha , Ubayy bin Kabb razi Allahu anhu ne kaha ke hum bhi wahi kehte hain jaisa ke Rasool Allah salla Allahu alaihi wasallam ne farmaya th .