Hum se Muhammad ne byaan kiya , kaha hum ko Abu Muawiyah ne khabar di , unhein Aamash ne , unhein Abu Salih ne aur un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ne farmaya ke do soor phoonke jaane ke darmiyan chalis fasla ho ga . Abu Hurairah razi Allahu anhu ke shagirdon ne poocha kya chalis din murad hain ? Unhon ne kaha ke mujhe maloom nahi phir shagirdon ne poocha kya chalis mahine murad hain ? Unhon ne kaha ke mujhe maloom nahi . Shagirdon ne poocha kya chalis saal murad hain ? Kaha ke mujhe maloom nahi . Kaha ke phir Allah Ta'ala aasman se pani barsaye ga . Jis ki wajah se tamam murde jee uthein ge jaise sabziyan pani se ugg aati hain . Is waqt insan ka har hissa gull chuka ho ga . Siwa reedh ki haddi ke aur is se Qayamat ke din tamam makhlooq dobara banayi jaye gi .

Hum se Umar bin Hafs ne byaan kiya , kaha mujh se mere walid ne byaan kiya , kaha hum se Aamash ne byaan kiya , unhon ne Abu Salih se suna aur unhon ne Abu Hurairah razi Allahu anhu se suna ke Nabi Karim salla Allahu alaihi wasallam ne farmaya ke donon sooron ke phoonke jaane ka darmiyani arsa chalis hai . Abu Hurairah razi Allahu anhu ke shagirdon ne poocha: kya chalis din murad hain ? Unhon ne kaha ke mujhe maloom nahi phir unhon ne poocha: chalis saal ? Is par bhi unhon ne inkar kiya . Phir unhon ne poocha: chalis mahine ? Is ke mutalliq bhi unhon ne kaha ke mujh ko khabar nahi aur har cheez fana ho jaye gi , siwa reedh ki haddi ke ke isi se saari makhlooq dobara banayi jaye gi .