Hum se Saad bin Hafs ne byaan kiya, kaha hum se Shayban ne byaan kiya, un se Yahya ne byaan kiya, kaha mujhe Abu Salamah bin Abdur Rahman ne khabar di, unhon ne byaan kiya ke ek shakhs Ibn Abbas razi Allahu anhuma ke paas aaya Abu Hurairah razi Allahu anhu bhi un ke paas baithe huay thay. Aane wale ne poocha ke Aap mujhe is aurat ke mutalliq masla bataiye jis ne apne shohar ki wafat ke char mahine baad bacha jana? Ibn Abbas razi Allahu anhuma ne kaha ke jis ka khawand faut ho woh iddat ki do muddaton mein jo muddat lambi ho is ki riayat kare. (Abu Salamah ne byaan kiya ke) main ne arz kiya ke (Quran Majeed mein to un ki iddat ka yeh hukm hai) hamal waliyon ki iddat un ke hamal ka paida ho jaana hai. Abu Hurairah razi Allahu anhu ne kaha ke main bhi is masle mein apne bhatije ke saath hoon. Un ki murad Abu Salamah bin Abdur Rahman se thi aakhir Ibn Abbas razi Allahu anhuma ne apne ghulam Kurayb ko Umm al-Momineen Umm Salamah razi Allahu anha ki khidmat mein bheja yahi masla poochne ke liye. Umm al-Momineen ne bataya ke Subay'ah Aslamiyyah ke shohar (Saad bin Khawlah razi Allahu anhuma) shaheed kar diye gaye thay woh is waqt hamila thien shohar ki maut ke chalis din baad un ke yahan bacha paida hua phir un ke paas nikah ka paigham pahuncha aur Rasool Allah salla Allahu alaihi wasallam ne un ka nikah kar diya. Abu al-Sanabil bhi un ke paas paigham e nikah bhejne walon mein se thay.

Hum se Yahya bin Bukayr ne byaan kiya , kaha hum se Layth bin Saad ne byaan kiya , in se Jafar bin Rabee ne , in se Abdur Rahman bin Hurmuz ne , kaha ke mujhe khabar di Abu Salamah bin Abdur Rahman ne ke Zaynub Umm Salamah razi Allahu anha ne apni walda Nabi Karim salla Allahu alaihi wasallam ki zauja mutahhara Umm Salamah razi Allahu anha se khabar di ke ek khatoon jo Islam layi thien aur jin ka naam Subay-ah tha , apne shohar ke saath rehti thien , shohar ka jab intiqal hua to woh hamila thien . Abu Sanabil bin Ba'kak razi Allahu anhu ne in ke paas nikah ka paigham bheja lekin unhon ne nikah karne se inkar kiya . Abu al-Sanabil ne kaha ke Allah ki qasam! Jab tak iddat ki do muddaton mein se lambi na guzar loon gi , tumhare liye is se (jis se nikah woh karna chahti thien) nikah karna sahih nahi ho ga . Phir woh (waza hamal ke baad) taqreeban das din tak ruki rahein . Is ke baad Nabi Karim salla Allahu alaihi wasallam ki khidmat mein hazir huien to Nabi Karim salla Allahu alaihi wasallam ne farmaya ke ab nikah kar lo .