Hum se Ubaydullah bin Musa ne byaan kiya, un se Israeel ne byaan kiya, un se Abu Ishaq ne aur un se Zayd bin Arqam razi Allahu anhuma ne byaan kiya ke main ne apne chacha ke saath tha main ne Abdullah bin Ubayy bin Salool ko kehte suna ke jo log Rasool (salla Allahu alaihi wasallam) ke paas hain un par kuch kharch na karo taake woh muntashir ho jayein aur agar ab hum Madinah wapas laut-te hain to hum mein se jo izzat wale hain un zaleelon ko nikal bahar kar dein ge. Main ne is ka zikr apne chacha se kiya aur unhon ne Rasool Allah salla Allahu alaihi wasallam se kaha jab Nabi Karim salla Allahu alaihi wasallam ne in hi ki tasdeeq kar di to mujhe is ka itna afsos hua ke pehle kabhi kisi baat par na hua ho ga, main gham se apne ghar mein baith gaya. Mere chacha ne kaha ke tumhara kya aisa khayal tha ke Nabi Karim salla Allahu alaihi wasallam ne tumhein jhutlaya aur tum par khafa huay hain? Phir Allah Ta'ala ne yeh aayat nazil hui «izha jaa-akal munafiqoona qaaloo nash-hadu innaka larasoolullahi» ”jab munafiq Aap ke paas aate hain to kehte hain ke Aap beshak Allah ke Rasool hain“ Nabi Karim salla Allahu alaihi wasallam ne mujhe bulwa kar is aayat ki tilawat farmayi aur farmaya ke Allah Ta'ala ne tumhari tasdeeq nazil kar di hai.

Hum se Abdullah bin Rajaa ne byaan kiya, kaha hum se Israeel bin Yunus ne byaan kiya, un se Ishaq ne aur un se Zayd bin Arqam razi Allahu anhuma ne byaan kiya ke main ek ghazwa (Ghazwa Tabook) mein tha aur main ne (munafiqon ke sardar) Abdullah bin Ubayy ko yeh kehte suna ke jo log (Muhajireen) Rasool Allah salla Allahu alaihi wasallam ke paas jama hain un par kharch na karo taake woh khud hi Rasool Allah salla Allahu alaihi wasallam se juda ho jayein ge. Is ne yeh bhi kaha ab agar hum Madinah laut kar jayein ge to izzat wala wahan se zillat walon ko nikal bahar kare ga. Main ne is ka zikr apne chacha (Saad bin Ubadah Ansari) se kiya ya Umar razi Allahu anhu se is ka zikr kiya. (rawi ko shak tha) unhon ne is ka zikr Nabi Karim salla Allahu alaihi wasallam se kiya. Nabi Karim salla Allahu alaihi wasallam ne mujhe bulaya main ne tamam baatein Aap ko suna dien. Nabi Karim salla Allahu alaihi wasallam ne Abdullah bin Ubayy aur is ke sathiyon ko bula bheja. Unhon ne qasam kha li kaha ke unhon ne is tarah ki koi baat nahi kahi thi. Is par Nabi Karim salla Allahu alaihi wasallam ne mujh ko jhoota samjha aur Abdullah ko sacha samjha. Mujhe is ka itna sadma hua ke aisa kabhi na hua tha. Phir main ghar mein baith raha. Mere chacha ne kaha ke mera khayal nahi tha ke Nabi Karim salla Allahu alaihi wasallam tumhari takzeeb karein ge aur tum par naraz hon ge. Phir Allah Ta'ala ne yeh surat nazil ki «izha jaa-akal munafiqoona» ”jab munafiq Aap ke paas aate hain“ is ke baad Nabi Karim salla Allahu alaihi wasallam ne mujhe bulwaya aur is surat ki tilawat ki aur farmaya ke Ae Zayd! Allah Ta'ala ne tum ko sacha kar diya hai.

Hum se Adam bin Abi Iyas ne byaan kiya, unhon ne kaha hum se Israeel bin Yunus ne byaan kiya, unhon ne kaha un se Abu Ishaq Sabii ne byaan kiya aur un se Zayd bin Arqam razi Allahu anhu ne byaan kiya ke main apne chacha (Saad bin Ubadah ya Abdullah bin Rawaha razi Allahu anhuma) ke saath tha main ne Abdullah bin Ubayy bin Salool ko kehte suna ke jo log Rasool Allah salla Allahu alaihi wasallam ke paas hain un par kharch mat karo taake woh in ke paas se bhaag jayein. Yeh bhi kaha ke agar ab hum Madinah laut kar jayein ge to izzat wala wahan se zaleelon ko nikal kar bahar kar de ga. Main ne is ki yeh baat chacha se aa kar kahi aur unhon ne Rasool Allah salla Allahu alaihi wasallam se is ka zikr kiya. Nabi Karim salla Allahu alaihi wasallam ne Abdullah bin Ubayy aur is ke sathiyon ko bulwaya unhon ne qasam kha li ke aaisi koi baat unhon ne nahi kahi thi. Nabi Karim salla Allahu alaihi wasallam ne bhi un ko sacha jaana aur mujh ko jhoota samjha. Mujhe is itna sadma pahuncha ke aisa kabhi nahi pahuncha ho ga phir main ghar ke andar baith gaya. Phir Allah Ta'ala ne yeh surat nazil ki «izha jaa-akal munafiqoona» se «humullazhina yaqooloona la tunfiqoo ala man inda rasoolillahi» aur aayat «layukhrijannal a-azzu minha al-azhalla» to Nabi Karim salla Allahu alaihi wasallam ne mujhe bulwaya aur mere samne is surat ki tilawat ki phir farmaya ke Allah ne tumhare byaan ko sacha kar diya hai.

Hum se Adam bin Abi Iyas ne byaan kiya, kaha hum se Shubah ne byaan kiya, un se Hakam ne byaan kiya, unhon ne kaha ke main ne Muhammad bin Kabb Qurazhi se suna, kaha ke main ne Zayd bin Arqam razi Allahu anhu se suna, unhon ne byaan kiya ke jab Abdullah bin Ubayy bin Salool ne kaha ke jo log Rasool Allah salla Allahu alaihi wasallam ke paas hain un par kharch na karo yeh bhi kaha ke ab agar hum Madinah wapas gaye to hum se izzat wala zaleelon ko nikal bahar kare ga to main ne yeh khabar Nabi Karim salla Allahu alaihi wasallam tak pahunchayi. Is par kuffar ne mujhe malamat ki aur Abdullah bin Ubayy ne qasam kha li ke is ne yeh baat nahi kahi ku phir main ghar wapas aa gaya aur so gaya. Is ke baad mujhe Nabi Karim salla Allahu alaihi wasallam ne mujhe talab farmaya aur main hazir hua to Aap salla Allahu alaihi wasallam ne farmaya ke Allah Ta'ala ne tumhari tasdeeq mein aayat nazil kar di hai aur yeh aayat utri hai «humullazhina yaqooloona la tunfiqoo» al-kh aakhir tak. Aur Ibn Abi Zaidah ne Aamash se byaan kiya, un se Amr ne, un se Ibn Abi Layla ne aur un se Zayd bin Arqam razi Allahu anhuma ne Nabi Karim salla Allahu alaihi wasallam se isi tarah naqal kiya.