Mujh se Yaqoob bin Ibrahim bin Kaseer ne byaan kiya, kaha ke hum se Usamah ne byaan kiya, kaha hum se Fudayl bin Ghazwan ne byaan kiya, un se Abu Hazim Ashjai ne aur un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ki khidmat mein ek sahab khud (Abu Hurairah razi Allahu anhu) hazir huay aur arz kiya: ya Rasool Allah! Main faaqay se hoon. Nabi Karim salla Allahu alaihi wasallam ne unhein azwaj e mutahharat ke paas bheja (ke woh Aap ki dawat karein) lekin un ke paas koi cheez khane ki nahi thi. Aap salla Allahu alaihi wasallam ne farmaya ke kya koi shakhs aisa nahi jo aaj raat is mehman ki mezbani kare? Allah is par raham kare ga. Is par ek Ansari sahabi (Abu Talha) kharay huay aur arz kiya: ya Rasool Allah! Yeh aaj mere mehman hain phir woh unhein apne saath ghar le gaye aur apni biwi se kaha ke yeh Rasool Allah salla Allahu alaihi wasallam ke mehman hain, koi cheez in se bacha ke na rakhna. Biwi ne kaha Allah ki qasam mere paas is waqt bachon ke khane ke siwa aur koi cheez nahi hai. Ansari sahabi ne kaha agar bache khana maangein to unhein sula do aur aao yeh chiragh bhi bujha do, aaj raat hum bhookay hi reh lein ge. Biwi ne aisa hi kiya. Phir woh Ansari sahabi subah ke waqt Rasool Allah salla Allahu alaihi wasallam ki khidmat mein hazir huay to Nabi Karim salla Allahu alaihi wasallam ne farmaya ke Allah Ta'ala ne falan (Ansari sahabi) aur un ki biwi (ke amal) ko pasand farmaya. Ya (Aap salla Allahu alaihi wasallam ne yeh farmaya ke) Allah Ta'ala muskuraya phir Allah Ta'ala ne yeh aayat nazil ki «wa yuseeroona ala anfusihim walau kaana bihim khasasatun» yani aur apne se muqaddam rakhte hain agarchay khud faaqay mein hi hon.

Hum se Musaddad ne bayan kiya, kaha hum se Abdullah Bin Dawood ne bayan kiya, un se Fazail Bin Ghazwan ne, un se Abu Hazim ne aur un se Abu Hurairah Radi Allahu Anhu ne ke ek sahab (khud Abu Hurairah Radi Allahu Anhu hi murad hain) Rasul Allah Sallallahu Alaihi Wasallam ki khidmat mein bhooke hazir hue, aap ne unhein Azwaj-e-Mutahharat ke yahan bheja. (Taake un ko khana khila dein) Azwaj-e-Mutahharat ne kehla bheja ke hamare paas pani ke siwa aur kuch nahi hai. Is par Aap Sallallahu Alaihi Wasallam ne farmaya ke in ki kaun mehmani kare ga? Ek Ansari Sahabi bole mein karoon ga. Chunanche wo un ko apne ghar le gaye aur apni biwi se kaha ke Rasul Allah Sallallahu Alaihi Wasallam ke mehman ki khatir tawajjo kar, biwi ne kaha ke ghar mein bacchon ke khane ke siwa aur koi cheez bhi nahi hai, unhon ne kaha jo kuch bhi hai ise nikal do aur chiragh jala lo aur bacche agar khana mangte hain to unhein sula do. Biwi ne khana nikal diya aur chiragh jala diya aur apne bacchon ko (bhooka) sula diya, phir wo dikha to ye rahi theen jaise chiragh durust kar rahi hon lekin unhon ne ise bujha diya, is ke baad dono miyan biwi mehman par zahir karne lage ke goya wo bhi un ke sath kha rahe hain, lekin un dono ne (apne bacchon samet raat) faqa se guzar di, subah ke waqt jab wo Sahabi Aap Sallallahu Alaihi Wasallam ki khidmat mein aaye to Aap Sallallahu Alaihi Wasallam ne farmaya tum dono miyan biwi ke naik amal par raat ko Allah Ta'ala hans para ya (ye farmaya ke ise) pasand kiya, is par Allah Ta'ala ne ye ayat nazil farmai «Wa yusiroona ala anfusihim walau kana bihim khasasatun wa may yuqa shuha nafsihi fa ulaika humul muflihoon» " Aur wo (Ansar) tarjeeh dete hain apne nafson ke upar (doosre ghareeb Sahaba ko) agarchay wo khud bhi faqa hi mein hon aur jo apni tabiyat ke bukhl se mehfooz rakkha gaya so aise hi log falah pane wale hain. "
.