Hum se Ubaydullah bin Musa ne byaan kiya , un se Israeel ne , un se Abu Ishaq ne aur un se Bara razi Allahu anhu ne byaan kiya ke Nabi Karim salla Allahu alaihi wasallam ke ek sahabi (Usayd bin Huzayr razi Allahu anhu raat mein Surah al-Kahf) parh rahe thay . Un ka ek ghora jo ghar mein bandha hua tha badakne laga to woh sahabi niklay unhon ne koi khaas cheez nahi dekhi woh ghora phir bhi badak raha tha . Subah ke waqt woh sahabi Nabi Karim salla Allahu alaihi wasallam ki khidmat mein hazir huay aur raat ka waqia byaan kiya . Aap salla Allahu alaihi wasallam ne farmaya ke woh cheez (jis se ghora badka tha) sakinat thi jo Quran ki wajah se nazil hui .

Hum se Muhammad bin Bashar ne bayan kiya, kaha hum se Ghundar ne bayan kiya, kaha hum se Shu'bah ne un se Abu Ishaq ne aur unhon ne Bara bin Azib Radi Allahu Anhu se suna. Unhon ne bayan kiya ke ek sahabi (Usaid bin Hudair Radi Allahu Anhu) ne (namaz mein) Surah al-Kahf ki tilawat ki. Isi ghar mein ghora bandha hua tha, ghore ne uchhalna koodna shuru kar diya. (Usaid ne idhar khayal na kiya is ko Allah ke supurd kiya) is ke baad jab unhon ne salam phera to dekha ke badal ke ek tukre ne un ke sare ghar par saya kar rakha hai. Is waqia ka zikr unhon ne Nabi Kareem Sallallahu Alaihi Wa Sallam se kiya to Aap Sallallahu Alaihi Wa Sallam ne farmaya ke Quran parhta hi reh kyunke yeh "Sakinah" hai jo Quran ki wajah se nazil hui ya (is ke bajaye rawi ne) "tanzallat lil-Quran" ke alfaz kahe.

Hum se Amr bin Khalid ne byaan kiya, kaha hum se Zuhayr ne byaan kiya, kaha hum se Abu Ishaq ne byaan kiya aur un se Bara bin Azib razi Allahu anhu ne ke ek sahabi (Usayd bin Huzayr) Surah al-Kahf parh rahe thay. Un ke ek taraf ek ghora do rasson se bandha hua thu. Is waqt ek abr oopar se aaya aur nazdeek se nazdeek tar hone laga. Un ka ghora is ki wajah se badakne laga. Phir subah ke waqt woh Nabi Karim salla Allahu alaihi wasallam ki khidmat mein hazir huay aur Aap se is ka zikr kiya to Nabi Karim salla Allahu alaihi wasallam ne farmaya ke woh (abr ka tukra) «sakeenatun» tha jo Quran ki tilawat ki wajah se utra tha.