Hum se Yahya bin Saeed ne byaan kiya , kaha hum se Layth bin Saad ne byaan kiya , un se Aqeel ne , un se Ibn Shihab ne , un se Abdur Rahman bin Abdullah ne aur un se Abdullah bin Kabb bin Malik ne byaan kiya ke unhon ne Kabb bin Malik razi Allahu anhu se un ke Ghazwa Tabook mein shareek na ho sakne ka waqia suna . Unhon ne batlaya , Allah ki qasam! Hidayat ke baad Allah ne mujh par itna bara aur koi inam nahi kiya jitna Rasool Allah salla Allahu alaihi wasallam ke samne sach bolne ke baad zahir hua tha ke us ne mujhe jhoot bolne se bachaya , warna main bhi isi tarah halak ho jata jis tarah doosre log jhooti mazratein byaan karne wale halak huay thay aur Allah Ta'ala ne un ke baare mein wahi nazil ki thi «sa-yahlifoona billahi lakum izha-nqalabtum ilayhim» ke ”anqareeb yeh log tumhare samne , jab tum un ke paas wapas jao ge . Allah ki qasam kha jayein ge .“ Aakhir aayat «al-fasiqeena» tak .

Hum se Yahya bin Bukayr ne byaan kiya , kaha hum se Layth bin Saad ne byaan kiya , un se Aqeel ne aur un ke alawa (Abu Salih Abdullah bin Salih) ne byaan kiya , ke mujh se Layth bin Saad ne byaan kiya , un se Aqeel ne byaan kiya , un se Ibn Shihab ne byaan kiya , unhein Ubaydullah bin Abdullah ne khabar di aur un se Ibn Abbas razi Allahu anhuma ne , un se Umar razi Allahu anhu ne jab Abdullah bin Ubayy bin Salool ki maut hui to Rasool Allah salla Allahu alaihi wasallam se is ki namaz e janaza parhane ke liye kaha gaya . Jab Aap salla Allahu alaihi wasallam namaz parhane ke liye kharay huay to main jaldi se khidmat e Nabwi mein pahuncha aur arz kiya ke ya Rasool Allah! Aap Ibn Ubayy (munafiq) ki namaz e janaza parhane lage haalan ke us ne falan falan din is is tarah ki baatein (Islam ke khilaf) ki thien ? Umar razi Allahu anhu ne byaan kiya ke main is ki kahi hui baatein ek ek kar ke pesh karne laga . Lekin Nabi Karim salla Allahu alaihi wasallam ne tabassum kar ke farmaya ke Umar! Mere paas se hat jao (aur saff mein ja ke kharay ho jao) . Main ne israr kiya to Aap salla Allahu alaihi wasallam ne farmaya ke mujhe ikhtiyar diya gaya hai . Is liye main ne (is ke liye istighfar karne aur is ki namaz e janaza parhane hi ko) pasand kiya , agar mujhe yeh maloom ho jaye ke sattar martaba se zyada istighfar karne se is ki maghfirat ho jaye gi to main sattar martaba se zyada istighfar karoon ga . Byaan kiya ke phir Nabi Karim salla Allahu alaihi wasallam ne namaz parhayi aur wapas tashreef laye , thori der abhi hui thi ke Surah Baraat ki do aayatein nazil huien «wa la tusalli ala ahadin minhum maata abadan» ke ”in mein se jo koi mar jaye is par kabhi bhi namaz na parh-ye .“ Aakhir aayat «wa hum fasiqoona» tak . Umar razi Allahu anhu ne byaan kiya ke baad mein mujhe Nabi Karim salla Allahu alaihi wasallam ke samne apni is darja jurat par khud bhi hairat hui aur Allah aur us ke Rasool behtar janne wale hain .