Hum se Musaddad ne byaan kiya , unhon ne kaha hum se Yahya ne byaan kiya , un se Imran Abi Bakr ne , un se Abu Rajaa ne byaan kiya aur un se Imran bin Husain razi Allahu anhuma ne byaan kiya ke (hajj mein) tamattu ka hukm Quran mein nazil hua aur hum ne Rasool Allah salla Allahu alaihi wasallam ke saath tamattu ke saath (hajj) kiya , phir is ke baad Quran ne is se nahi roka aur na is se Nabi Karim salla Allahu alaihi wasallam ne roka , yahan tak ke Aap ki wafat ho gayi (lehaza tamattu ab bhi jaiz hai) yeh to ek sahab ne apni rai se jo chaha keh diya hai .

Hum se Abdullah Bin Yusuf ne bayan kiya, kaha humein Imam Malik (Rahimahullah) ne khabar di, unhein Yahya Bin Saeed ne, unhon ne bayan kiya ke mein ne Abu-al-Hubab Saeed Bin Yasar se suna, unhon ne kaha ke mein ne Abu Hurairah (Radi Allahu Anhu) se suna, unhon ne bayan kiya ke Nabi Kareem (Sallallahu Alaihi Wasallam) ne farmaya ke mujhe ek aise shehar (mein hijrat) ka hukm hua hai jo doosre shehron ko kha le ga. (Yani sab ka sardar bane ga) munafiqeen usay Yasrib kehte hain lekin is ka naam Madinah hai wo (bure) logon ko is tarah bahar kar deta hai jis tarah bhatti lohe ke zang ko nikal deti hai
.