Hum se Amr bin Ali ne byaan kiya , kaha hum se Yahya ne byaan kiya , kaha hum se Sufyan ne byaan kiya , un se Habib ne , un se Saeed bin Jubayr ne aur un se Ibn Abbas razi Allahu anhuma ne byaan kiya ke Umar razi Allahu anhu ne farmaya , hum mein sab se behtar qaari e Quran Ubayy bin Kabb razi Allahu anhu hain aur hum mein sab se zyada Ali razi Allahu anhu mein qaza yani faisle karne ki salahiyat hai . Is ke bawajood hum Ubayy razi Allahu anhu ki is baat ko tasleem nahi karte jo Ubayy razi Allahu anhu kehte hain ke main ne Rasool Allah salla Allahu alaihi wasallam se jin aayat ki bhi tilawat suni hai , main unhein nahi chhor sakta . Haalan ke Allah Ta'ala ne khud farmaya hai «ma nansakh min aayatin au nunsiha» al-kh ke ”Hum ne jo aayat bhi mansookh ki ya usay bhulaya to phir is se achhi aayat laye .“

Hum se Sadaqah bin Fadl ne byaan kiya , kaha hum ko Yahya bin Saeed Qattan ne khabar di , unhein Sufyan Sawri ne , unhein Habib bin Abi Sabit ne , unhein Saeed bin Jubayr ne aur un se Ibn Abbas razi Allahu anhuma ne byaan kiya ke Umar razi Allahu anhu ne kaha , Ubayy bin Kabb hum mein sab se achhe qaari hain lekin Ubayy jahan ghalati karte hain us ko hum chhor dete hain (woh baaz mansookh-ut-tilawa aayaton ko bhi parhte hain) aur kehte hain ke main ne to is aayat ko Nabi Karim salla Allahu alaihi wasallam ke munh mubarak se suna hai , main kisi ke kehne se usay chhorne wala nahi aur Allah ne khud farmaya hai «ma nansakh min aayatin au nunsiha na'ti bi-khayrin minha au misliha» ke ”hum jab kisi aayat ko mansookh kar dete hain phir ya to usay bhula dete hain ya is se behtar laate hain .“