Hum se Sulayman bin Harb ne byaan kiya , kaha hum se Hammad bin Zayd ne byaan kiya , un se Sabit Banani ne aur un se Anas bin Malik razi Allahu anhu ne ke shiddat e marz ke zamane mein Nabi Karim salla Allahu alaihi wasallam ki be-chaini bahut barh gayi thi . Fatimah al-Zahra razi Allahu anha ne kaha: Aah , Abba jaan ko kitni be-chaini hai . Aap salla Allahu alaihi wasallam ne is par farmaya ke aaj ke baad tumhare Abba jaan ki yeh be-chaini nahi rahe gi . Phir jab Nabi Karim salla Allahu alaihi wasallam ki wafat ho gayi to Fatima razi Allahu anha kehti thien , haye Abba jaan! Aap apne Rabb ke bulawe par chale gaye , haye Abba jaan! Aap Jannat al-Firdous mein apne maqam par chale gaye . Hum Jibraeel alaihissalam ko Aap ki wafat ki khabar sunate hain . Phir jab Nabi Karim salla Allahu alaihi wasallam dafan kar diye gaye to Aap razi Allahu anha ne Anas razi Allahu anhu se kaha ”Anas! Tumhare dil Rasool Allah salla Allahu alaihi wasallam ki naash par mitti daalne ke liye kis tarah aamada ho gaye thay .“

Hum se Abu al-Nu'man ne byaan kiya ‘ kaha hum se Abu Awanah ne byaan kiya ‘ un se Abu Bishr ne ‘ un se Saeed bin Jubayr ne ‘ un se Ibn Abbas razi Allahu anhuma ne byaan kiya ke Umar razi Allahu anhu mujhe apni majlis mein is waqt bhi bula lete jab wahan Badr ki jang mein shareek hone wale buzurg sahabah razi Allahu anhum baithe hote . Is par baaz log kehne lage is jawan ko Aap hamari majlis mein kyun bulate hain ? Is ke jaise to hamare bache bhi hain . Is par Umar razi Allahu anhu ne kaha woh to in logon mein se hai jin ka ilm o fazl tum jaante ho . Unhon ne byaan kiya ke phir in buzurg sahabiyon ko ek din Umar razi Allahu anhu ne bulaya aur mujhe bhi bulaya . Byaan kiya ke main samajhta tha ke mujhe is din Aap ne is liye bulaya tha taake Aap mera ilm bata sakein . Phir Aap ne daryaft kiya «izha jaa'a nasrullahi wal fathu * wa ra'aytan naasa yadkhuloon» ‘ khatm surat tak ‘ ke mutalliq tum logon ka kya khayal hai ? Kisi ne kaha ke hamain is aayat mein hukm diya gaya hai ke hum Allah ki hamd byaan karein aur us se istighfar karein ke us ne hamari madad ki aur hamain fatah inayat farmayi . Baaz ne kaha ke hamain is ke mutalliq kuch maloom nahi hai aur baaz ne koi jawab nahi diya phir unhon ne mujh se daryaft kiya: Ibn Abbas! Kya tumhara bhi yahi khayal hai ? Main ne jawab diya ke nahi ‘ poocha ‘ phir tum kya kehte ho ? Main ne kaha ke is mein Rasool Allah salla Allahu alaihi wasallam ki wafat ki taraf isharah hai ke jab Allah Ta'ala ki madad aur fatah haasil ho gayi . Yani Fatah Makkah to yeh Aap salla Allahu alaihi wasallam ki wafat ki nishani hai . Is liye Aap apne Rabb ki hamd aur tasbeeh aur us ki maghfirat talab karein ke woh tauba qabool karne wala hai . Umar razi Allahu anhu ne kaha ke jo kuch tum ne kaha wahi main bhi samajhta hoon .