Zuhri ne byaan kiya aur un se Abu Salamah ne byaan kiya , un se Abdullah bin Abbas razi Allahu anhuma ne ke Abu Bakr razi Allahu anhu aaye to Umar razi Allahu anhu logon se kuch keh rahe thay . Abu Bakr razi Allahu anhu ne kaha: Umar! Baith jao , lekin Umar razi Allahu anhu ne baithne se inkar kiya . Itne mein log Umar razi Allahu anhu ko chhor kar Abu Bakr razi Allahu anhu ke paas aa gaye aur Aap ne khutba e masnoona ke baad farmaya: Amma baad! Tum mein jo bhi Muhammad salla Allahu alaihi wasallam ki ibadat karta tha to usay maloom hona chahiye ke Aap ki wafat ho chuki hai aur jo Allah Ta'ala ki ibadat karta tha to (is ka mabood) Allah hamesha zinda rehne wala hai aur is ko kabhi maut nahi aaye gi . Allah Ta'ala ne khud farmaya hai «wa ma muhammadun illa rasoolun qad khalat min qablihir rusulu» ke ”Muhammad sirf Rasool hain , un se pehle bhi Rasool guzar chuke hain .“ Irshad «ash-shakireen» tak . Ibn Abbas razi Allahu anhuma ne byaan kiya: Allah ki qasam! Aaisa mehsoos hua ke jaise pehle se logon ko maloom hi nahi tha ke Allah Ta'ala ne yeh aayat nazil ki hai aur jab Abu Bakr razi Allahu anhu ne is ki tilawat ki to sab ne un se yeh aayat seekhi . Ab yeh haal tha ke jo bhi sunta tha wahi is ki tilawat karne lag jata tha . (Zuhri ne byaan kiya ke) Phir mujhe Saeed bin Musayyab ne khabar di ke Umar razi Allahu anhu ne kaha: Allah ki qasam! Mujhe is waqt hosh aaya , jab main ne Abu Bakr razi Allahu anhu ko is aayat ki tilawat karte suna , jis waqt main ne unhein tilawat karte suna ke Nabi Karim salla Allahu alaihi wasallam ki wafat ho gayi hai to main sakte mein aa gaya aur aisa mehsoos hua ke mere paon mera bojh nahi utha payein ge aur main zameen par gir jaon ga .

Hum se Bishr bin Muhammad ne byaan kiya , unhein Abdullah bin Mubarak ne khabar di , kaha ke mujhe Mamar bin Rashid aur Yunus ne khabar di , unhein Zuhri ne , kaha ke mujhe Abu Salamah ne khabar di ke Nabi Karim salla Allahu alaihi wasallam ki zauja mutahira Aisha razi Allahu anha ne unhein khabar di ke (jab Nabi Karim salla Allahu alaihi wasallam ki wafat ho gayi) Abu Bakr razi Allahu anhu apne ghar se jo Sunh mein tha ghore par sawaar ho kar aaye aur utarte hi masjid mein tashreef le gaye . Phir Aap kisi se guftagu kiye baghair Aisha razi Allahu anha ke hujra mein aaye (jahan Nabi Karim salla Allahu alaihi wasallam ki naash mubarak rakkhi hui thi) aur Nabi Karim salla Allahu alaihi wasallam ki taraf gaye . Nabi Karim salla Allahu alaihi wasallam ko Burd-e-Hibrah (Yemen ki bani hui dhaari daar chadar) se dhaank diya gaya tha . Phir Aap ne Nabi Karim salla Allahu alaihi wasallam ka chehra mubarak khola aur jhuk kar is ka bosa liya aur rone lage . Aap ne kaha mere maan baap Aap par qurban hon ae Allah ke Nabi! Allah Ta'ala do mautein Aap par kabhi jama nahin kare ga . Siwa ek maut ke jo Aap ke muqaddar mein thi so Aap wafat pa chuke . Abu Salamah ne kaha ke mujhe Ibn Abbas razi Allahu anhuma ne khabar di ke Abu Bakr razi Allahu anhu jab bahar tashreef laaye to Umar razi Allahu anhu is waqt logon se kuch baatein kar rahe thay . Siddiq-e-Akbar razi Allahu anhu ne farmaya ke baith jao . Lekin Umar razi Allahu anhu nahin maane . Phir dobara Aap ne baithne ke liye kaha . Lekin Umar razi Allahu anhu nahin maane . Aakhir Abu Bakr razi Allahu anhu ne kalma-e-shahadat parha to tamam majma Aap ki taraf mutawajja ho gaya aur Umar razi Allahu anhu ko chhor diya . Aap ne farmaya amma baad! agar koi shakhs tum mein se Muhammad salla Allahu alaihi wasallam ki ibadat karta tha to ise maloom hona chahiye ke Muhammad salla Allahu alaihi wasallam ki wafat ho chuki aur agar koi Allah Ta'ala ki ibadat karta hai to Allah Ta'ala baaqi rehne wala hai . Kabhi woh marne wala nahin . Allah Paak ne farmaya hai ”aur Muhammad sirf Allah ke Rasool hain aur bohat se Rasool is se pehle bhi guzar chuke hain“ «ash-shakireen» tak (Aap ne aayat tilawat ki) qasam Allah ki aisa maloom hua ke Abu Bakr razi Allahu anhu ke aayat ki tilawat se pehle jaise logon ko maloom hi na tha ke yeh aayat bhi Allah Paak ne Quran Majeed mein utari hai . Ab tamam sahaba ne yeh aayat Aap se seekh li phir to har shakhs ki zaban par yehi aayat thi .

Aur baad mein Abu Bakr Radi Allahu Anhu ne jo haq aur hidayat ki baat thi woh logon ko samajha di aur un ko batla diya jo un par lazim tha (yani Islam par qaim rehna) aur woh yeh aayat tilawat karte hue bahar aaye "wa ma Muhammadun illa rasulun qad khalat min qablihir-rusul" "Muhammad (Sallallahu Alaihi Wa Sallam) ek Rasool hain aur un se pehle bhi Rasool guzar chuke hain "ash-shakireen" tak.