Hum se Mahmood Bin Ghailan ne bayan kiya ‘ kaha hum se Abdur Razzaq ne bayan kiya ‘ kaha hum ko Ma'mar ne khabar di ‘ unhein Zuhri ne ‘ unhein Abu Salama ne aur in se Jabir Bin Abdullah (Radi Allahu Anhuma) ne bayan kiya ke hum Nabi Kareem Sallallahu Alaihi Wasallam ke sath Najd ki taraf ghazwa ke liye gaye. Dopahar ka waqt hua to Aap ek jangal mein pahunche jahan babool ke darakht bahut thay. Aap ne ghane darakht ke neeche saye ke liye qayam kiya aur darakht se apni talwar tika di. Sahaba (Radi Allahu Anhum) bhi darakhton ke neeche saya hasil karne ke liye phail gaye. Abhi hum isi kaifiyat mein thay ke Nabi Kareem Sallallahu Alaihi Wasallam ne humein pukara. Hum hazir hue to ek badwi Aap ke samne baitha hua tha. Aap Sallallahu Alaihi Wasallam ne farmaya ke ye shakhs mere pas aaya to mein so raha tha. Itne mein is ne meri talwar khinch li aur mein bhi bedaar ho gaya. Ye meri nangi talwar khinche hue mere sar par khara tha. Mujh se kehne laga aaj mujh se tumhein kaun bachaye ga? Mein ne kaha ke Allah! (Wo shakhs sirf ek lafz se itna maroob hua ke) talwar ko niyam mein rakh kar baith gaya aur dekh lo. Ye baitha hua hai. Aap Sallallahu Alaihi Wasallam ne ise koi saza nahi di
.

Hum se Abul Yaman ne bayan kiya, kaha ke hum ko Shuaib ne khabar di, un se Zuhri ne bayan kiya, kaha mujh se Sinan Bin Abi Sinan Al-Dauli aur Abu Salama Bin Abdur Rahman ne bayan kiya aur unhein Jabir Bin Abdullah (Radi Allahu Anhuma) ne khabar di ke wo Rasul Allah (Sallallahu Alaihi Wasallam) ke sath Najd ke atraaf mein ek ghazwah mein shareek thay. Jab Rasul Allah (Sallallahu Alaihi Wasallam) jihad se wapas hue to aap ke sath ye bhi wapas hue. Raste mein qaylula ka waqt ek aisi wadi mein hua jis mein babool ke darakht bakasrat thay. Rasul Allah (Sallallahu Alaihi Wasallam) ne is wadi mein parao kiya aur sahaba poori wadi mein (darakht ke saye ke liye) phail gaye. Aap (Sallallahu Alaihi Wasallam) ne bhi ek babool ke neeche qiyam farmaya aur apni talwar darakht par latka di. Hum sab so gaye thay ke Rasul Allah (Sallallahu Alaihi Wasallam) ke pukarane ki awaz sunayi di, dekha gaya to ek badwi aap (Sallallahu Alaihi Wasallam) ke paas tha. Rasul Allah (Sallallahu Alaihi Wasallam) ne farmaya ke is ne ghaflat mein meri hi talwar mujh par kheench li thi aur mein soya hua tha, jab bedar hua to nangi talwar is ke hath mein thi. Is ne kaha mujh se tumhein kaun bachaye ga? Mein ne kaha ke Allah! Teen martaba (mein ne isi tarah kaha aur talwar is ke hath se chhoot kar gir gayi) Rasul Allah (Sallallahu Alaihi Wasallam) ne aarabi ko koi saza nahi di balke aap (Sallallahu Alaihi Wasallam) baith gaye (phir wo khud mutassir ho kar Islam laya)
.

Hum se Abul Yaman ne bayan kiya, kaha ke hum ko Shuaib ne khabar di, unhein Zuhri ne, un se Sinan Bin Abi Sinan aur Abu Salama ne bayan kiya aur in donon hazrat ko Jabir (Radi Allahu Anhu) ne khabar di. Aur hum se Musa Bin Ismail ne bayan kiya, unhein Ibrahim Bin Saad ne khabar di, unhein Ibn Shihab ne khabar di, unhein Sinan Bin Abi Sinan Al-Dauli ne aur unhein Jabir Bin Abdullah (Radi Allahu Anhuma) ne khabar di ke wo Nabi Kareem (Sallallahu Alaihi Wasallam) ke sath ek larai mein shareek thay. Ek aise jangal mein jahan babool ke darakht bakasrat thay. Qaylula ka waqt ho gaya, tamam sahaba saye ki talash mein (poori wadi mein mutafarriq darakhton ke neeche) phail gaye aur Nabi Kareem (Sallallahu Alaihi Wasallam) ne bhi ek darakht ke neeche qiyam farmaya. Aap (Sallallahu Alaihi Wasallam) ne talwar (darakht ke tane se) latka di thi aur so gaye thay. Jab aap (Sallallahu Alaihi Wasallam) bedar hue to aap (Sallallahu Alaihi Wasallam) ke paas ek ajnabi maujood tha. Is ajnabi ne kaha ke ab tumhein mujh se kaun bachaye ga? Phir Nabi Kareem (Sallallahu Alaihi Wasallam) ne awaz di aur jab sahaba (Radi Allahu Anhum Ajmaeen) aap (Sallallahu Alaihi Wasallam) ke qareeb pahunche to aap (Sallallahu Alaihi Wasallam) ne farmaya ke is shakhs ne meri hi talwar mujh par kheench li thi aur mujh se kehne laga tha ke ab tumhein mere hath se kaun bacha sake ga? Mein ne kaha Allah (is par wo shakhs khud hi dahshat-zada ho gaya) aur talwar niyam mein kar li, ab ye baitha hua hai. Aap (Sallallahu Alaihi Wasallam) ne ise koi saza nahi di thi
.

Aur Abu Al-Zubair ne Jabir Radi Allahu Anhu se bayan kiya ke hum Nabi Kareem Sallallahu Alaihi Wasallam ke sath maqam-e-Nakhl mein thay to Aap Sallallahu Alaihi Wasallam ne namaz-e-khauf parhayi aur Abu Huraira Radi Allahu Anhu ne bayan kiya ke mein ne Nabi Kareem Sallallahu Alaihi Wasallam ke sath namaz-e-khauf Ghazwa Najd mein parhi thi. Ye yaad rahe ke Abu Huraira Radi Allahu Anhu Nabi Kareem Sallallahu Alaihi Wasallam ki khidmat mein (sab se pehle) Ghazwa Khaibar ke mauqe par hazir hue thay
.