Mujh se Hisham bin Ammar ne bayan kiya, kaha hum se Sadaqah bin Khalid ne bayan kiya, un se Zaid bin Waqid ne bayan kiya, un se Busr bin Ubaidullah ne, un se Aidhullah Abu Idrees ne aur un se Abu al-Darda Radi Allahu Anhu ne bayan kiya ke mein Nabi Kareem Sallallahu Alaihi Wa Sallam ki khidmat mein hazir tha ke Abu Bakr Radi Allahu Anhu apne kapre ka kinara pakre hue, ghutna zahir kiye hue aaye. Nabi Kareem Sallallahu Alaihi Wa Sallam ne yeh halat dekh kar farmaya ke maloom hota hai tumhare dost kisi se lar kar aaye hain. Phir Abu Bakr Radi Allahu Anhu ne hazir ho kar salam kiya aur arz kiya: Ya Rasul Allah! Mere aur Umar bin Khattab ke darmiyan kuch takrar ho gayi thi aur is silsile mein, mein ne jaldi mein un ko sakht lafz keh diye lekin baad mein mujhe sakht nadamat hui to mein ne un se maafi chahi, ab woh mujhe maaf karne ke liye tayyar nahi hain. Isi liye mein Aap ki khidmat mein hazir hua hun. Aap Sallallahu Alaihi Wa Sallam ne farmaya ke Ae Abu Bakr! Tumhein Allah maaf kare. Teen martaba Aap ne yeh jumla irshad farmaya Umar Radi Allahu Anhu ko bhi nadamat hui aur Abu Bakr Radi Allahu Anhu ke ghar pahunche aur poocha kya Abu Bakr ghar par maujood hain? Maloom hua ke nahi to Aap bhi Nabi Kareem Sallallahu Alaihi Wa Sallam ki khidmat mein hazir hue aur Aap ne salam kiya. Nabi Kareem Sallallahu Alaihi Wa Sallam ka chehra mubarak ghusse se badal gaya aur Abu Bakr Radi Allahu Anhu dar gaye aur ghutnon ke bal baith kar arz karne lage, Ya Rasul Allah! Allah ki qasam ziyati meri hi taraf se thi. Do martaba yeh jumla kaha. Is ke baad Aap Sallallahu Alaihi Wa Sallam ne farmaya ke Allah ne mujhe tumhari taraf nabi bana kar bheja tha. Aur tum logon ne mujh se kaha tha ke tum jhoot bolte ho lekin Abu Bakr ne kaha tha ke Aap sacche hain aur apni jaan-o-maal ke zariye unhon ne meri madad ki thi to kya tum log mere dost ko satana chhorhte ho ya nahi? Aap ne do dafa yahi farmaya: Aap ke yeh farmane ke baad phir Abu Bakr Radi Allahu Anhu ko kisi ne nahi sataya.

Hum se Abdullah ne byaan kiya , unhon ne kaha hum se Sulayman bin Abdur Rahman aur Musa bin Haroon ne byaan kiya , unhon ne kaha ke hum se Waleed bin Muslim ne byaan kiya , kaha hum se Abdullah bin Alaa bin Zubayr ne byaan kiya , kaha ke mujh se Busr bin Abdullah ne byaan kiya , kaha ke mujh se Abu Idrees Khulani ne byaan kiya , kaha ke main ne Abu Dardaa razi Allahu anhu se suna , unhon ne byaan kiya ke Abu Bakr aur Umar razi Allahu anhuma ke darmiyan kuch bahas si ho gayi thi . Umar razi Allahu anhu Abu Bakr razi Allahu anhu par ghussa ho gaye aur un ke paas se aane lage . Abu Bakr razi Allahu anhu bhi un ke peeche peeche ho gaye , maafi maangte huay . Lekin Umar razi Allahu anhu ne unhein maaf nahi kiya aur (ghar pahunch kar) andar se darwaza band kar liya . Ab Abu Bakr razi Allahu anhu Rasool Allah salla Allahu alaihi wasallam ki khidmat mein hazir huay . Abu Dardaa razi Allahu anhu ne byaan kiya ke hum log is waqt Nabi Karim salla Allahu alaihi wasallam ki khidmat mein hazir thay . Nabi Karim salla Allahu alaihi wasallam ne farmaya ke tumhare yeh sahib (yani Abu Bakr razi Allahu anhu) lar aaye hain . Rawi ne byaan kiya ke Umar razi Allahu anhu bhi apne tarz e amal par nadim huay aur Nabi Karim salla Allahu alaihi wasallam ki taraf chale aur salam kar ke Aap salla Allahu alaihi wasallam ke qareeb baith gaye . Phir Nabi Karim salla Allahu alaihi wasallam se saara waqia byaan kiya . Abu Dardaa razi Allahu anhu ne byaan kiya ke Aap bahut naraz huay . Idhar Abu Bakr razi Allahu anhu baar baar yeh arz karte ke ya Rasool Allah! Waqayi meri hi ziyadati thi . Phir Nabi Karim salla Allahu alaihi wasallam ne farmaya ke kya tum log mujhe mere saathi se juda karna chahte ho ? Kya tum log mere saathi ko mujh se juda karna chahte ho ? Jab main ne kaha tha ke ae insano! Beshak main Allah ka Rasool hoon , tum sab ki taraf , to tum logon ne kaha ke tum jhoot bolte ho , is waqt Abu Bakr ne kaha tha ke Aap sache hain . Abu Abdullah ne kaha «ghaamira» ke maani hadees mein yeh hai ke Abu Bakr razi Allahu anhu ne bhalayi mein sabqat ki hai .