Hum se Ahmad bin Ishaq ne bayan kiya, kaha hum se Ubaidullah bin Musa ne bayan kiya, kaha hum se Israil ne bayan kiya, un se Abu Ishaq ne, un se Amr bin Maimoon ne aur un se Abdullah bin Mas'ud Radi Allahu Anhu ne bayan kiya ke Sa'd bin Mu'adh Radi Allahu Anhu umrah ki niyat se (Makkah) aaye aur Abu Safwan Umaiyah bin Khalaf ke yahan utre. Umaiyah bhi Shaam jate hue (tijarat waghaira ke liye) jab Madinah se guzarta to Sa'd bin Mu'adh Radi Allahu Anhu ke yahan qayam kiya karta tha. Umaiyah ne Sa'd Radi Allahu Anhu se kaha: Abhi thehro, jab dopahar ka waqt ho jaye aur log ghafil ho jayein (tab tawaf karna kyunke Makkah ke mushrik Musalmanon ke dushman thay) Sa'd Radi Allahu Anhu kehte hain, chunanche mein ne ja kar tawaf shuru kar diya. Sa'd Radi Allahu Anhu abhi tawaf kar hi rahe thay ke Abu Jahl aa gaya aur kehne laga, yeh Ka'bah ka tawaf kon kar raha hai? Sa'd Radi Allahu Anhu bole ke mein Sa'd hun. Abu Jahl bola: Tum Ka'bah ka tawaf khoob aman se kar rahe ho halankay Muhammad Sallallahu Alaihi Wa Sallam aur is ke sathiyon ko panah de rakhi hai. Sa'd Radi Allahu Anhu ne kaha: Haan theek hai. Is tarah dono mein baat barh gayi. Phir Umaiyah ne Sa'd Radi Allahu Anhu se kaha: Abu al-Hakam (Abu Jahl) ke samne unchi awaz se na bolo. Woh is waadi (Makkah) ka sardar hai. Is par Sa'd Radi Allahu Anhu ne kaha: Allah ki qasam agar tum ne mujhe Baitullah ke tawaf se roka to mein bhi tumhari Shaam ki tijarat khak mein mila dunga (kyunke Shaam jane ka sirf ek hi rasta hai jo Madinah se jata hai) bayan kiya ke Umaiyah barabar Sa'd Radi Allahu Anhu se yahi kehta raha ke apni awaz buland na karo aur unhein (muqabla se) rokta raha. Aakhir Sa'd Radi Allahu Anhu ko is par ghussa aa gaya aur unhon ne Umaiyah se kaha. Chal pare hatt mein ne Muhammad Sallallahu Alaihi Wa Sallam se tere mutalliq suna hai. Aap ne farmaya tha ke tujh ko Abu Jahl hi qatal karayega. Umaiyah ne poocha: Mujhe? Sa'd Radi Allahu Anhu kaha: Haan tujh ko. Tab to Umaiyah kehne laga. Allah ki qasam Muhammad (Sallallahu Alaihi Wa Sallam) jab koi baat kehte hain to woh ghalat nahi hoti phir woh apni biwi ke pas aaya aur us ne us se kaha tumhein maloom nahi, mere Yathribi bhai ne mujhe kya baat batayi hai? Us ne poocha: Unhon ne kya kaha? Umaiyah ne bataya ke Muhammad (Sallallahu Alaihi Wa Sallam) keh chuke hain ke Abu Jahl mujh ko qatal karayega. Woh kehne lagi. Allah ki qasam Muhammad Sallallahu Alaihi Wa Sallam ghalat baat zaban se nahi nikalte. Phir aisa hua ke ahl-e-Makkah Badr ki ladayi ke liye rawana hone lage aur Umaiyah ko bhi bulane wala aaya to Umaiyah se us ki biwi ne kaha, tumhein yaad nahi raha tumhara Yathribi bhai tumhein kya khabar de gaya tha. Bayan kiya ke is yaaddahani par Umaiyah ne chaha ke is jang mein shirkat na kare. Lekin Abu Jahl ne kaha: Tum waadi Makkah ke raees ho. Is liye kam az kam ek ya do din ke liye hi tumhein chalna parega. Is tarah woh un ke sath jang mein shirkat ke liye nikla aur Allah Ta'ala ne is ko qatal kara diya.

Mujh se Ahmad Bin Usman ne bayan kiya, hum se Shuraih Bin Maslamah ne bayan kiya, hum se Ibrahim Bin Yusuf ne bayan kiya, un se in ke walid ne, un se Abu Ishaq ne bayan kiya ke mujh se Amr Bin Maimoon ne bayan kiya, unhon ne Abdullah Bin Masood Radi Allahu Anhu se suna, wo Saad Bin Muaz Radi Allahu Anhu se bayan karte thay, unhon ne kaha ke wo Umayyah Bin Khalaf ke (jahiliyat ke zamane se) dost thay aur jab bhi Umayyah Madinah se guzarta to in ke yahan qiyam karta tha. Isi tarah Saad Radi Allahu Anhu jab Makkah se guzarte to Umayyah ke yahan qiyam karte. Jab Nabi Kareem Sallallahu Alaihi Wasallam Madinah hijrat kar ke tashreef laye to ek martaba Saad Radi Allahu Anhu Makkah umrah ke irade se gaye aur Umayyah ke paas qiyam kiya. Unhon ne Umayyah se kaha ke mere liye koi tanhayi ka waqt batao taake mein Baitullah ka tawaf karoon. Chunanche Umayyah unhein dopahar ke waqt sath le kar nikla. In se Abu Jahl ki mulaqat ho gayi. Us ne poocha, Abu Safwan! Ye tumhare sath kaun hain? Umayyah ne bataya ke ye Saad Bin Muaz Radi Allahu Anhu hain. Abu Jahl ne kaha, mein tumhein Makkah mein aman ke sath tawaf karta hua na dekhoon. Tum ne bedeenon ko panah de rakkhi hai aur is khayal mein ho ke tum log in ki madad karo ge. Khuda ki qasam! Agar is waqt tum, Abu Safwan! Umayyah ke sath na hote to apne ghar salamti se nahi ja sakte thay. Is par Saad Radi Allahu Anhu ne kaha, is waqt in ki aawaz buland ho gayi thi ke Allah ki qasam! Agar aaj tum ne mujhe tawaf se roka to mein bhi Madinah ki taraf se tumhara rasta band kar doon ga aur ye tumhare liye bahut si mushkilat ka bais ban jaye ga. Umayyah kehne laga, Saad! Abu-ul-Hakam (Abu Jahl) ke samne buland aawaz se na bolo. Ye wadi ka sardar hai. Saad Radi Allahu Anhu ne kaha, Umayyah! Is tarah ki guftagu na karo. Allah ki qasam! Mein Rasul Allah Sallallahu Alaihi Wasallam se sun chuka hoon ke tu in ke hathon se maara jaye ga. Umayyah ne poocha. Kya Makkah mein mujhe qatl karein ge? Unhon ne kaha ke is ka mujhe ilm nahi. Umayyah ye sun kar bahut ghabra gaya aur jab apne ghar lauta to (apni biwi se) kaha, Umm Safwan! Dekha nahi Saad mere mutaliq kya keh rahe hain. Us ne poocha, kya keh rahe hain? Umayyah ne kaha ke wo ye bata rahe thay ke Muhammad (Sallallahu Alaihi Wasallam) ne unhein khabar di hai ke kisi na kisi din wo mujhe qatl kar dein ge. Mein ne poocha kya Makkah mein mujhe qatl karein ge? To unhon ne kaha ke is ki mujhe khabar nahi. Umayyah kehne laga: Khuda ki qasam! Ab Makkah se bahar mein kabhi nahi jaoon ga. Phir Badr ki larai ke mauqa par jab Abu Jahl ne Quraish se larai ki tayyari ke liye kaha aur kaha ke apne qafila ki madad ko chalo to Umayyah ne larai mein shirkat pasand nahi ki, lekin Abu Jahl is ke paas aaya aur kehne laga, ay Safwan! Tum wadi ke sardar ho. Jab log dekhein ge ke tum hi larai mein nahi nikalte ho to doosre log bhi nahi niklein ge. Abu Jahl yun hi barabar is ko samjhata raha. Aakhir majboor ho kar Umayyah ne kaha jab nahi manta to Khuda ki qasam (is larai ke liye) mein aisa tez raftar oont khareedoon ga jis ka sani Makkah mein na ho. Phir Umayyah ne (apni biwi se) kaha, Umm Safwan! Mera saman tayyar kar de. Us ne kaha, Abu Safwan! Apne Yasribi bhai ki baat bhool gaye? Umayyah bola, mein bhoola nahi hoon. In ke sath sirf thori door tak jaoon ga. Jab Umayyah nikla to rasta mein jis manzil par bhi theherna hota, ye apna oont (apne paas hi) bandhe rakhta. Wo barabar aisa hi ihtiyat karta raha yahan tak ke Allah Ta'ala ne ise qatl kara diya
.