Mujh se Ishaq Bin Rahwayh ne bayan kiya, kaha hum ko Fazal Bin Musa ne khabar di, unhein Juaid Bin Abdur Rahman ne ke mein ne Saib Bin Yazid (Radi Allahu Anhu) ko churanway saal ki umr mein dekha ke khaasay quwi-o-tawana thay. Unhon ne kaha ke mujhe yaqeen hai ke mere kaanon aur aankhon se jo mein nafa hasil kar raha hoon wo sirf Rasul Allah (Sallallahu Alaihi Wasallam) ki dua ki barkat hai. Meri khala mujhe ek martaba Aap (Sallallahu Alaihi Wasallam) ki khidmat mein le gayeen. Aur arz kiya: Ya Rasul Allah! Ye mera bhanja bimar hai, aap is ke liye dua farma dein. Unhon ne bayan kiya ke phir Aap (Sallallahu Alaihi Wasallam) ne mere liye dua farmayi
.

Hum se Abdur Rahman bin Younus ne bayan kiya, unhon ne kaha hum se Hatim bin Ismail ne Ja’d ke waaste se bayan kiya, kaha unhon ne Saaib bin Yazeed se suna, woh kehte the ke meri khaala mujhe Nabi Kareem Sallallahu Alaihi Wasallam ki khidmat mein le gayien aur arz kiya ke ya Rasoolallah! Mera yeh bhaanja beemaar hai, Aap Sallallahu Alaihi Wasallam ne mere sar par apna haath phera aur mere liye barkat ki dua farmaayi, phir Aap Sallallahu Alaihi Wasallam ne Wuzu kiya aur main ne Aap Sallallahu Alaihi Wasallam ke Wuzu ka bacha huwa paani piya. Phir main Aap Sallallahu Alaihi Wasallam ki kamar ke peeche khada ho gaya aur main ne mohr-e-nabuwwat dekhi jo Aap Sallallahu Alaihi Wasallam ke moondhon ke darmiyaan aisi thi jaise chhapar-khat ki ghundi. (Ya kabootar ka anda).