Hum se Farwa Bin Abi-ul-Maghra ne bayan kiya, kaha hum se Ali Bin Mushir ne bayan kiya, un se Hisham Bin Urwah ne, un se un ke baap ne aur un se Aisha (Radi Allahu Anha) ne bayan kiya ke Harith Bin Hisham (Radi Allahu Anhu) ne Nabi Kareem (Sallallahu Alaihi Wasallam) se pucha ke wahi Aap ke paas kis tarah aati hai? Aap (Sallallahu Alaihi Wasallam) ne farmaya ke kai tarah se aati hai. Kabhi farishta ke zariya aati hai to wo ghanti bajne ki awaz ki tarah nazil hoti hai. Jab wahi khatam ho jati hai to jo kuch farishte ne nazil kiya hota hai, mein ise poori tarah yaad kar chuka hota hoon. Wahi utarne ki ye surat mere liye bahut dushwar hoti hai. Kabhi farishta mere samne ek mard ki surat mein aa jata hai wo mujh se baatein karta hai aur jo kuch keh jata hai mein ise poori tarah yaad kar leta hoon
.

Hum ko Abdullah bin Yousuf ne Hadees bayan ki, un ko Maalik ne Hishaam bin Urwah ki riwayat se khabar di, unhon ne apne waalid se naql ki, unhon ne Umm ul Mo’mineen Aisha Siddiqah Radhiallahu Anha se naql ki aap ne farmaaya ke ek shakhs Haris bin Hishaam naami ne Nabi Kareem Sallallahu Alaihi Wasallam se sawaal kiya tha ke ya RasoolAllah! Aap par Wahi kaise naazil hoti hai? Aap Sallallahu Alaihi Wasallam ne farmaaya ke Wahi naazil hote waqt kabhi mujh ko ghanti ki si aawaaz mehsoos hoti hai aur Wahi ki yeh kaifiyat mujh par bahut shaaq guzarti hai. Jab yeh kaifiyat khatm hoti hai to mere dil o dimaagh par us (farishte) ke zariye naazil shudah Wahi mehfooz ho jaati hai aur kisi waqt aisa hota hai ke farishta bashakl-e-insaan mere paas aata hai aur mujh se kalaam karta hai. Pas main us ka kaha huwa yaad rakh leta hun. Aisha Radhiallahu Anha ka bayan hai ke main ne sakht kadaake ki sardi main Nabi Kareem Sallallahu Alaihi Wasallam ko dekha hai ke Aap Sallallahu Alaihi Wasallam par Wahi naazil hue aur jab us ka silsila mauqoof huwa to Aap Sallallahu Alaihi Wasallam ki peshani paseene se sharaabor thi.