Hum se Ali Bin Abdullah Madini ne bayan kiya, kaha hum ko Ismail Bin Aliyya ne khabar di, unhein Ali Bin Mubarak ne kaha, un se Yahya Bin Abi Kaseer ne bayan kiya, un se Muhammad Bin Ibrahim Bin Harith ne, un se Abu Salama Bin Abdur Rahman ne un ka ek doosre sahab se ek zameen ke bare mein jhagda tha. Wo Aisha (Radi Allahu Anha) ki khidmat mein hazir hue aur un se waqiya bayan kiya. Unhon ne (jawab mein) farmaya: Abu Salama! Kisi ki zameen (ke na-haqq lene) se bacho, kyunke Rasul Allah (Sallallahu Alaihi Wasallam) ne farmaya hai ke agar ek balisht ke barabar bhi kisi ne (zameen ke bare mein) zulm kiya to (Qiyamat ke din) sath zameenon ka tauq ise pehnaya jaye ga
.

Hum se Abul Yaman ne bayan kiya, unhon ne kaha hum ko Shuayb ne khabar di, unhon ne kaha ke hum se Zuhri ne bayan kiya, un se Talha Bin Abdullah ne bayan kiya, unhein Abdur Rahman Bin Amr Bin Sahl ne khabar di aur un se Saeed Bin Zaid (Radi Allahu Anhu) ne bayan kiya ke mein ne Rasul Allah (Sallallahu Alaihi Wasallam) se suna, Aap (Sallallahu Alaihi Wasallam) ne farmaya jis ne kisi ki zameen zulm se lay li, ise Qiyamat ke din saat zameeno ka tauq pehnaya jaye ga
.

Hum se Abu Muammar ne bayan kiya, unhon ne kaha ke hum se Abdur Waris ne bayan kiya, un se Husain ne bayan kiya, un se Yahya Bin Abi Kaseer ne ke mujh se Muhammad Bin Ibrahim ne bayan kiya, un se Abu Salama ne bayan kiya ke in ke aur baaz doosre logon ke darmiyan (zameen ka) jhagrah tha. Is ka zikar unhon ne Aisha (Radi Allahu Anha) se kiya to unhon ne batlaya, Abu Salama! zameen se parheiz kar Nabi Kareem (Sallallahu Alaihi Wasallam) ne farmaya, agar kisi shakhs ne ek balisht bhar zameen bhi kisi doosre ki zulm se lay li to saat zameeno ka tauq (Qiyamat ke din) is ke gardan mein dala jaye ga
.

Hum se Muslim Bin Ibrahim ne bayan kiya, kaha hum se Abdullah Bin Mubarak ne bayan kiya, kaha hum se Musa Bin Uqbah ne bayan kiya Salim se aur un se in ke walid (Abdullah Bin Umar Radi Allahu Anhuma) ne ke Nabi Kareem (Sallallahu Alaihi Wasallam) ne farmaya, jis shakhs ne nahak kisi zameen ka thora sa hissa bhi lay liya, to Qiyamat ke din ise saat zameeno tak dhansaya jaye ga. Abu Abdullah (Imam Bukhari Rahimahullah) ne kaha ke ye hadees Abdullah Bin Mubarak ki is kitab mein nahi hai jo Khurasan mein thi. Balkay is mein thi jise unhon ne Basrah mein apne shagirdon ko imla karaya tha
.

Hum se Ubaid Bin Ismail ne bayan kiya, kaha hum se Abu Usama ne bayan kiya, un se Hisham Bin Urwah ne, un se un ke walid ne aur un se Said Bin Zaid Bin Amr Bin Nufail (Radi Allahu Anhu) ne ke Arwa Bint Abi Aus se un ka ek (zameen ke) bare mein jhagda hua. Jis ke mutaliq Arwa kehti thi ke Said ne meri zameen chheen li. Ye muqaddama Marwan Khalifa ke yahan faisla ke liye gaya jo Madinah ka hakim tha. Said (Radi Allahu Anhu) ne kaha bhala kya mein un ka haqq daba loon ga, mein gawahi deta hoon ke mein ne Rasul Allah (Sallallahu Alaihi Wasallam) ko ye farmate suna hai ke jis ne ek balisht zameen bhi zulm se kisi ki daba li to Qiyamat ke din saaton zameenon ka tauq is ki gardan mein dala jaye ga. Ibn Abi-uz-Zinad ne bayan kiya, un se Hisham ne, un se un ke walid ne bayan kiya, aur un se Said Bin Zaid (Radi Allahu Anhu) ne bayan kiya ke mein Nabi Kareem (Sallallahu Alaihi Wasallam) ki khidmat mein maujood thay (tab Aap Sallallahu Alaihi Wasallam ne ye hadees bayan farmayi thi)
.