Hum se Musaddad bin Musarhad ne bayan kiya, kaha hum se Mu’tamir bin Sulaiman ne Khalid ke waaste se bayan kiya, woh ’Ikrimah se woh Aisha Radhiallahu Anha se ke ba’z Ummahaat-ul-Momineen ne aitekaaf kiya halaanki woh mustahaaza thien. (Upar waali riwayat mein in hi ka zikr hai).

Hum se Ishaaq bin Shaheen Abu Bishr Waasiti ne bayan kiya, unhon ne kaha hum se Khalid bin Abdullah ne bayan kiya, unhon ne Khalid bin Mahran se, unhon ne ’Ikrimah se, unhon ne Aisha Radhiallahu Anha se ke Nabi-e-Kareem Sallallahu Alaihi Wasallam ke saath Aap Sallallahu Alaihi Wasallam ki ba’z azwaaj ne aitekaaf kiya, halaanki woh mustahaaza thien aur unhein khoon aata tha. Is liye khoon ki wajah se tasht aksar apne neeche rakh letien. Aur ’Ikrimah ne kaha ke Aisha Radhiallahu Anha ne kasm ka paani dekha to farmaaya yeh to aisa hi ma’loom hota hai jaise falaan sahibah ko istihaaza ka khoon aata tha.

Hum se Qutaibah bin Sa’eed ne bayan kiya, kaha hum se Yazeed bin Zurai’ ne Khalid se, woh ’Ikrimah se, woh Aisha Radhiallahu Anha se, unhon ne kaha ke Rasoolullah Sallallahu Alaihi Wasallam ke saath Aap Sallallahu Alaihi Wasallam ki azwaaj mein se ek ne aitekaaf kiya. Woh khoon aur zardi (nikalte) dekhtien, tasht un ke neeche hota aur Namaz ada karti thien.

Hum se Qutaiba ne bayan kiya, kaha ke hum se Yazid Bin Zuraie ne bayan kiya, un se Khalid ne, un se Ikrima ne aur un se Aisha (Radi Allahu Anha) ne bayan kiya ke Rasul Allah (Sallallahu Alaihi Wasallam) ke sath aap ki biwiyon mein se ek khatoon (Umm-e-Salma Radi Allahu Anha) ne jo mustahaza theen, aitikaf kiya. Wo surkhi aur zardi (yaani istihaza ka khoon) dekhti theen. Aksar tasht hum un ke neeche rakh dete aur wo namaz parhti rehtein
.