Hum se Abdullah Bin Muhammad ne bayan kiya ‘ kaha hum se Sufyan Bin Uyainah ne bayan kiya ‘ in se Amr Bin Dinar ne aur in se Jabir Bin Abdullah Ansari (Radi Allahu Anhu) ne ke Rasul Allah (Sallallahu Alaihi Wasallam) ne farmaya "Kaab Bin Ashraf ke liye kaun himmat karta hai?" Muhammad Bin Muslima (Radi Allahu Anhu) ne kaha kya mein ise qatl kar doon? Aap (Sallallahu Alaihi Wasallam) ne farmaya "Haan!" Unhon ne arz kiya ke phir Aap mujhe ijazat dein (ke mein jo chahun jhoot sach kahun) Aap (Sallallahu Alaihi Wasallam) ne farmaya "Meri taraf se is ki ijazat hai."
.

Hum se Ali Bin Abdullah ne bayan kiya, kaha hum se Sufyan Bin Uyaina ne ke Amr Bin Dinar ne bayan kiya ke mein ne Jabir Bin Abdullah (Radi Allahu Anhuma) se suna wo keh rahe thay ke Rasul Allah (Sallallahu Alaihi Wasallam) ne farmaya Kaab Bin Ashraf (Yahudi Islam ka pakka dushman) ka kaam kaun tamam kare ga ke us ne Allah aur us ke Rasul ko bahut takleef de rakkhi hai. Muhammad Bin Maslama (Radi Allahu Anhu) ne kaha ke mein (ye khidmat anjam doon ga) chunanchay wo us ke paas gaye aur kaha ke ek ya do wasaq ghalla qarz lene ke irade se aaya hoon. Kaab ne kaha lekin tumhein apni biwiyon ko mere yahan girwi rakhna hoga. Muhammad Bin Maslama aur us ke sathiyon ne kaha ke hum apni biwiyon ko tumhare paas kis tarah girwi rakh sakte hain jab ke tum sare Arab mein khubsoorat ho. Us ne kaha ke phir apni aulad girwi rakh do. Unhon ne kaha ke hum apni aulad kis tarah rehan rakh sakte hain isi par unhein gali di jaya kare gi ke ek do wasaq ghalle ke liye rehan rakh diye gaye thay to hamare liye bari sharam ki baat hogi. Albatta hum apne hathiyar tumhare yahan rehan rakh sakte hain. Sufyan ne kaha ke lafz "Lia-mati" se murad hathiyar hain. Phir Muhammad Bin Maslama (Radi Allahu Anhu) us se dubara milne ka wada kar ke (chale aaye aur raat ko us ke yahan pahunch kar) ise qatal kar diya. Phir Nabi Kareem (Sallallahu Alaihi Wasallam) ki khidmat mein hazir hue aur Aap (Sallallahu Alaihi Wasallam) ko khabar di
.