Hum se Abdan ne bayan kiya, kaha hum ko Abdullah Bin Mubarak ne khabar di, kaha hum ko Yunus ne khabar di, unhein Ibn Shihab ne, un se Salaba Bin Abi Malik ne kaha ke Umar Bin Khattab (Radi Allahu Anhu) ne Madinah ki khawateen mein kuch chadrein taqseem kiin. Ek nayi chadar bach gayi to baaz hazrat ne jo aap ke paas hi thay kaha ya Ameer-ul-Momineen! Ye chadar Rasul Allah (Sallallahu Alaihi Wasallam) ki nawasi ko de dijaiye, jo aap ke ghar mein hain. Un ki murad (aap ki biwi) Umm-e-Kulsoom Bint Ali (Radi Allahu Anha) se thi lekin Umar (Radi Allahu Anhu) ne jawab diya ke Umm-e-Salit is ki ziyada mustahiq hain. Ye Umm-e-Salit (Radi Allahu Anha) un ansari khawateen mein se thiin jinhon ne Rasul Allah (Sallallahu Alaihi Wasallam) se bai'at ki thi. Umar (Radi Allahu Anhu) ne farmaya ke aap Uhud ki larai ke mauqe par hamare liye mashkize (pani ke) utha kar lati thiin. Abu Abdullah (Imam Bukhari Rahimahullah) ne kaha (hadees mein) lafz «tzfr» ka maani ye hai ke seeti thi
.

Hum se Yahya Bin Bukair ne bayan kiya, kaha hum se Laith ne bayan kiya, un se Yunus ne bayan kiya, un se Ibn Shihab ne bayan kiya ke Salaba Bin Abi Malik ne bayan kiya ke Umar Bin Khattab Radi Allahu Anhu ne Madina ki khawateen mein chadaren taqseem karwayin. Ek umda qism ki chadar baqi bach gayi to ek sahib ne jo wahin maujood thay, arz kiya: Ya Ameer-ul-Momineen! Ye chadar Rasul Allah Sallallahu Alaihi Wasallam ki nawasi ko de dijiye jo Aap ke nikah mein hain. In ka ishara Umm-e-Kulsum Bint-e-Ali (Radi Allahu Anha) ki taraf tha. Lekin Umar Radi Allahu Anhu bole ke Umm-e-Salit Radi Allahu Anha in se zyada mustahiq hain. Umm-e-Salit Radi Allahu Anha ka talluq qabila-e-Ansar se tha aur unhon ne Rasul Allah Sallallahu Alaihi Wasallam se baiat ki thi. Umar Radi Allahu Anhu ne kaha ke Ghazwa Uhud mein wo hamare liye pani ki mashk bhar bhar kar lati thin
.