Hum se Abdullah bin Muhammed Musnadi ne bayan kiya, kaha hum se Uthman bin Umar ne bayan kiya, kaha hum ko Younus ne khabar di Zohri ke waaste se, woh Abu Salamah se, woh Abu Hurairah Radhiallahu Anhu se ke Namaz ki takbeer hue aur safein barabar ho gayien, log khade the ke Rasoolullah Sallallahu Alaihi Wasallam apne hujre se hamaari taraf tashreef laaye. Jab Aap Sallallahu Alaihi Wasallam musalle par khade ho chuke to yaad aaya ke Aap junubi hain. Pas Aap Sallallahu Alaihi Wasallam ne hum se farmaaya ke apni jagah khade raho aur Aap waapas chale gaye. Phir Aap Sallallahu Alaihi Wasallam ne ghusl kiya aur waapas hamaari taraf tashreef laaye to sar se paani ke qatre tapak rahe the. Aap Sallallahu Alaihi Wasallam ne Namaz ke liye takbeer kahi aur hum ne Aap Sallallahu Alaihi Wasallam ke saath Namaz ada ki. Uthman bin Umar se is riwayat ki Mutaba’at ki hai Abdul A’laa ne Ma’mar se aur woh Zohri se. Aur Awzaa’ee ne bhi Zohri se is Hadees ko riwayat kiya hai.

Aur isi sanad se (yeh bhi) farmaaya ke tum mein se koi thehre huwe paani mein jo jaari na ho peshaab na kare. Phir usi mein ghusl karne lage.

Hum se Abdul Aziz bin Abdullah ne byaan kiya , kaha ke hum se Ibrahim bin Saad ne byaan kiya , woh Saleh bin Kaysan se , woh Ibn Shihab se , woh Abu Salama bin Abdur Rahman se , woh Abu Hurayrah razi Allahu anhu se ke Rasool Allah salla Allahu alaihi wasallam (ek din hijray se) bahar tashreef laye , iqamat kahi ja chuki thi aur safain barabar ki ja chuki thein . Aap salla Allahu alayhi wasallam jab musallay par kharay huay to hum intizaar kar rahe thay ke ab Aap salla Allahu alayhi wasallam takbeer kehtay hain . Lekin Aap salla Allahu alayhi wasallam wapas tashreef le gaye aur farmaya ke apni apni jagah par thehray raho . Hum usi haalat mein thehray rahe yahan tak ke Aap salla Allahu alayhi wasallam dobara tashreef laye , to sar mubarak se paani tapak raha tha . Aap salla Allahu alayhi wasallam ne ghusl kiya tha .

Hum se Ishaaq bin Mansoor ne byaan kiya , kaha ke hamein Muhammad bin Yusuf Faryabi ne khabar di ke kaha hum se Awzai ne Ibn Shihab Zuhri se byaan kiya , unhon ne Abu Salama bin Abdur Rahman se , unhon ne Abu Hurayrah razi Allahu anhu se ke unhon ne farmaya ke namaaz ke liye iqamat kahi ja chuki thi aur logon ne safain seedhi kar li thein . Phir Rasool Allah salla Allahu alayhi wasallam tashreef laye aur aage barhe . Lekin haalat junub mein thay (magar pehle khayal na raha) is liye Aap salla Allahu alayhi wasallam ne farmaya ke tum log apni apni jagah thehray raho . Phir Aap salla Allahu alayhi wasallam wapas tashreef laye to Aap salla Allahu alayhi wasallam ghusl kiye huay thay aur sar mubarak se paani tapak raha tha . Phir Aap salla Allahu alayhi wasallam ne logon ko namaaz parhayi .