Hum se Muhammad Bin Abdullah ne bayan kiya, unhon ne kaha hum se Abdul Aziz Bin Abdullah Owaisi aur Ishaq Bin Muhammad Farvi ne bayan kiya, unhon ne kaha ke hum se Muhammad Bin Jafar ne bayan kiya, un se Abu Hazim ne bayan kiya aur un se Sahl Bin Saad (Radi Allahu Anhu) ne bayan kiya ke Qaba ke logon ne aapas mein jhagra kiya aur naubat yahan tak pahunchi ke ek ne doosre par patthar phenke, Aap (Sallallahu Alaihi Wasallam) ko jab is ki itla di gayi to Aap (Sallallahu Alaihi Wasallam) ne farmaya "Chalo hum un mein sula karayein ge."
.

Hum se Abdullah bin Yusuf ne byaan kiya , kaha ke hamein Imam Malik ne Abu Hazim Salamah bin Dinar se khabar di , unhon ne Sahl bin Saad Saidi (Sahabi razi Allahu anhu) se ke Rasool Allah salla Allahu alaihi wasallam Bani Amr bin Awf mein (Quba mein) sulah karane ke liye gaye , pas namaaz ka waqt aa gaya . Moazzin (Bilal razi Allahu anhu ne) Abu Bakr razi Allahu anhu se aa kar kaha ke kya Aap namaaz parhayen ge . Main takbeer kahoon . Abu Bakr razi Allahu anhu ne farmaya ke haan chunanchay Abu Bakr Siddiq razi Allahu anhu ne namaaz shuru kar di . Itne mein Rasool Allah salla Allahu alaihi wasallam tashreef le aye to log namaaz mein thay . Aap salla Allahu alaihi wasallam safon se guzar kar pehli saf mein pohanchay . Logon ne ek haath ko doosre par mara (taake Abu Bakr razi Allahu anhu Nabi Karim salla Allahu alaihi wasallam ki aamad par agaah ho jayen) lekin Abu Bakr razi Allahu anhu namaaz mein kisi taraf tawajjoh nahi dete thay . Jab logon ne mutawatir haath par haath marna shuru kiya to Siddiq Akbar razi Allahu anhu mutawajjah huay aur Rasool Allah salla Allahu alaihi wasallam ko dekha . Aap salla Allahu alaihi wasallam ne ishaare se unhein apni jagah rehne ke liye kaha . (ke namaaz parhaye jao) lekin unhon ne apne haath utha kar Allah ka shukr kiya ke Rasool Allah salla Allahu alaihi wasallam ne un ko imamat ka izzaz bakhsha , phir bhi woh peeche hat gaye aur saf mein shamil ho gaye . Is liye Nabi Karim salla Allahu alaihi wasallam ne aage barh kar namaaz parhayi . Namaaz se farigh ho kar Aap salla Allahu alaihi wasallam ne farmaya ke Abu Bakr jab main ne Aap ko hukm de diya tha phir Aap thabit qadam kyun na rahe . Abu Bakr razi Allahu anhu bole ke Abu Quhafah ke bete (yani Abu Bakr) ki yeh haisiyat na thi ke Rasool Allah salla Allahu alaihi wasallam ke saamne namaaz parha saken . Phir Rasool Allah salla Allahu alaihi wasallam ne logon ki taraf khitab karte huay farmaya ke ajeeb baat hai . Main ne dekha ke tum log bakasrat taliyan baja rahe thay . (yaad rakho) agar namaaz mein koi baat pesh aa jaye to Subhan Allah kehna chahiye jab woh yeh kahe ga to us ki taraf tawajjoh ki jayegi aur yeh tali bajana auraton ke liye hai .