Hum se Adam Bin Abi Iyas ne bayan kiya, kaha hum se Shuba ne bayan kiya, hum se Wasil Bin Hayyan ne jo kubre thay, bayan kiya, kaha ke mein ne Ma'roor Bin Suwaid se suna, unhon ne kaha ke mein ne Abu Zar Ghifari (Radi Allahu Anhu) ko dekha ke un ke badan par bhi ek jora tha aur un ke ghalam ke badan par bhi isi qisam ka ek jora tha. Hum ne is ka sabab poocha to unhon ne batlaya ke ek dafa meri ek sahab (yani Bilal Radi Allahu Anhu se) se kuch gali galoch ho gayi thi. Unhon ne Nabi Kareem (Sallallahu Alaihi Wasallam) se meri shikayat ki, Aap (Sallallahu Alaihi Wasallam) ne mujh se poocha ke kya tum ne unhein un ki maan ki taraf se aar dilayi hai? Phir Aap (Sallallahu Alaihi Wasallam) ne farmaya, tumhare ghalam bhi tumhare bhai hain agarche Allah Ta'ala ne unhein tumhari matahti mein de rakkha hai. Is liye jis ka bhi koi bhai is ke qabze mein ho ise wahi khilaye jo wo khud khata hai aur wahi pehnaye jo wo khud pehnta hai aur un par un ki taqat se zyada bojh na dale. Lekin agar un ki taqat se zyada bojh dalo to phir un ki khud madad bhi kar diya karo
.

Hum se bayan kiya Abdur Rahman bin Mubarak ne, kaha hum se bayan kiya Hammad bin Zaid ne, kaha hum se bayan kiya Ayyub aur Younus ne, unhon ne Hasan se, unhon ne Ahnaf bin Qais se, kaha ke main us shakhs (Ali Radhiallahu Anhu) ki madad karne ko chala. Raaste mein mujh ko Abu Bakarah mile. Poocha kahaan jaate ho? Main ne kaha, us shakhs (Ali Radhiallahu Anhu) ki madad karne ko jaata hun. Abu Bakarah ne kaha apne ghar ko laut jaao. Main ne Nabi Kareem Sallallahu Alaihi Wasallam se suna hai Aap Sallallahu Alaihi Wasallam farmaate the jab do musalmaan apni apni talwaaren le kar bhid jayein to qaatil aur maqtool dono dozakhi hain. Main ne arz kiya ya RasoolAllah! Qaatil to khair (zaroor dozakhi hona chaahiye) maqtool kiun? Farmaaya“Woh bhi apne saathi ko maar daalne ki hirs rakhta tha.”(Mauqa paata to woh use zaroor qatl kar deta dil ke azm-e-sameem par woh dozakhi huwa).