Hum se Qutaiba Bin Saeed ne bayan kiya, kaha ke hum se Ismail Bin Jafar ne bayan kiya, un se Musa Bin Uqbah ne, un se Salim Bin Abdullah Bin Umar (Radi Allahu Anhuma) ne aur un se in ke baap ne ke Nabi Kareem (Sallallahu Alaihi Wasallam) ne (Makkah ke liye tashreef lay jate hue) jab Dhul Hulaifah mein nale ke nasheeb mein raat ke aakhri hisse mein parao kiya to Aap (Sallallahu Alaihi Wasallam) se khwab mein kaha gaya ke Aap is waqt ek mubarak waadi mein hain. Musa Bin Uqbah (rawi hadees) ne bayan kiya ke Salim (Salim Bin Abdullah Bin Umar Radi Allahu Anhuma) ne bhi humare sath wahin oont bithaya. Jahan Abdullah Bin Umar (Radi Allahu Anhuma) bithaya karte thay, taake is jagah qayam kar sakein, jahan Nabi Kareem (Sallallahu Alaihi Wasallam) ne qayam farmaya tha. Ye jagah Waadi-e-Aqeeq ki masjid se nale ke nasheeb mein hai. Waadi-e-Aqeeq aur raste ke darmiyan mein
.

Hum se Muhammad bin Abi Bakr Muqaddami ne bayan kiya kaha hum se Fudail bin Sulaiman ne , kaha hum se Moosa bin Uqba ne , kaha mein ne Salim bin Abdullah bin Umar raziyallahu anhuma ko dekha ke woh Madina se Makka tak raste mein kai jagahon ko dhondh kar wahan namaz parhte aur kehte ke un ke walid Abdullah bin Umar raziyallahu anhuma bhi un maqamat par namaz parha karte thay . Aur unhon ne Rasool Allah salla Allahu alaihi wa sallam ko un maqamat par namaz parhte hue dekha hai aur Moosa bin Uqba ne kaha ke mujh se Nafi ne Ibn Umar raziyallahu anhuma ke mutalliq bayan kiya ke woh un maqamat par namaz parha karte thay . Aur mein ne Salim se poocha to mujhe khoob yaad hai ke unhon ne bhi Nafi ke bayan ke mutabiq hi tamam maqamat ka zikr kiya . Faqat maqam Sharaf Ruha ki masjid ke mutalliq dono ne ikhtilaf kiya .

Aur Abdullah bin Umar raziyallahu anhuma ne Nafi se bayan kiya ke Nabi Karim salla Allahu alaihi wa sallam ne is pahari ke dono konon ka rukh kiya jo is ke aur Jabal Taweel ke darmiyan Kaaba ki simt hain . Aap salla Allahu alaihi wa sallam is masjid ko jo ab wahan tameer hui hai apni bayen taraf kar lete tele ke kinare . Aur Nabi Karim salla Allahu alaihi wa sallam ke namaz parhne ki jagah is se neechay siyah tele par thi tele se taqreeban das hath chhor kar pahari ki dono ghatiyon ki taraf rukh kar ke namaz parhte jo tumhare aur Kaaba ke darmiyan hai .

Hum se Abdullah bin Yusuf ne byaan kiya , unhon ne kaha ke humein Imam Malik ne khabar di , unhein Nafi ne , unhein Abdullah bin Umar razi Allahu anhuma ne ke Rasool Allah salla Allahu alaihi wasallam ne maqam-e-Zul Hulaifah ke pathreely maidan mein apni sawari roki aur phir wahin Aap salla Allahu alaihi wasallam ne namaaz parhi . Abdullah bin Umar razi Allahu anhuma bhi aisa hi kiya karte thay .

Hum se Ibrahim bin Al-Munzir ne byaan kiya , unhon ne kaha ke hum se Anas bin Iyadh ne byaan kiya , un se Ubaidullah Umari ne byaan kiya , un se Nafi ne byaan kiya aur un se Abdullah bin Umar razi Allahu anhuma ne byaan kiya ke Rasool Allah salla Allahu alaihi wasallam Shajarah ke raste se guzarte hue ”Muarris“ ke raste se Madina aate . Nabi Karim salla Allahu alaihi wasallam jab Makka jate to Shajarah ki masjid mein namaaz parhte lekin wapsi mein Zul Hulaifah ke nasheeb mein namaaz parhte . Aap salla Allahu alaihi wasallam raat wahin guzarte ta-aanke subah ho jati .

Hum se Muhammad ne byaan kiya , kaha ke hum se Abu Asim , Dahhak bin Makhlad Nabeel ne byaan kiya , kaha ke humein Ibn Juraij ne khabar di kaha ke mujhe Ata bin Abi Rabah ne khabar di , unhein Safwan bin Yala ne , kaha ke in ke baap Yala bin Umayyah ne Umar razi Allahu anhu se kaha ke kabhi Aap mujhe Nabi Karim salla Allahu alaihi wasallam ko is haal mein dikhayiye jab Aap salla Allahu alaihi wasallam par wahi nazil ho rahi ho . Unhon ne byaan kiya ke ek baar Rasool Allah salla Allahu alaihi wasallam Jaranah mein apne as'haab ki ek jamaat ke saath thehre hue thay ke ek shakhs ne aa kar poocha Ya Rasool Allah! Is shakhs ke mutalliq Aap ka kya hukm hai jis ne Umrah ka ahram is tarah baandha ke us ke kapre khushbu mein basay hue hon . Nabi Karim salla Allahu alaihi wasallam is par thori der ke liye chup ho gaye . Phir Aap salla Allahu alaihi wasallam par wahi nazil hui to Umar razi Allahu anhu ne Yala razi Allahu anhu ko ishaara kiya . Yala aaye to Rasool Allah salla Allahu alaihi wasallam par ek kapra tha jis ke andar Aap salla Allahu alaihi wasallam tashreef rakhte thay . Unhon ne kapre ke andar apna sar kiya to kya dekhte hain ke roye mubarak surkh hai aur Aap salla Allahu alaihi wasallam kharrate le rahe hain . Phir yeh haalat khatam hui to Aap salla Allahu alaihi wasallam ne farmaya ke woh shakhs kahan hai jis ne Umrah ke mutalliq poocha tha . Shakhs-e-mazkoor hazir kiya gaya to Aap salla Allahu alaihi wasallam ne farmaya ke jo khushbu laga rakhi hai usay teen martaba dho le aur apna jubba utaar de . Umrah mein bhi isi tarah kar jis tarah Hajj mein karte ho . Maine Ata se poocha ke kya Nabi Karim salla Allahu alaihi wasallam ke teen martaba dhoune ke hukm se poori tarah safayi muraad thi ? To unhon ne kaha ke haan .

Hum se Ahmad Bin Hajjaj ne bayan kiya, unhon ne kaha hum se Anas Bin Iyaz ne bayan kiya, un se Ubaidullah ne, un se Nafi ne aur un se Abdullah Bin Umar (Radi Allahu Anhuma) ne ke Nabi Kareem (Sallallahu Alaihi Wasallam) jab Makkah tashreef le jate to Masjid Shajarah mein namaz parhte. Aur jab wapas hote to Zu Al-Hulaifah ki wadi ke nasheeb mein namaz parhte. Aap (Sallallahu Alaihi Wasallam) subah tak sari raat wahin rehte
.

`Hum se Abdur Rahman bin Mubarak ne bayan kiya, kaha hum se Fuzail ne bayan kiya, unhon ne kaha hum se Musa bin Uqba ne bayan kiya, un se Salim bin Abdullah ne, un se un ke walid Abdullah bin Umar Radi Allahu Anhuma ne ke Nabi Kareem صلی اللہ علیہ وسلم ko jab ke aap maqaam-e-Zul-Hulaifa mein padao kiye hue thay, khwab dikhaya gaya aur kaha gaya ke aap ek mubarak wadi mein hain.