Hum se Ibrahim Bin Musa ne bayan kiya, kaha ke hum ko Hisham Bin Yusuf ne khabar di, kaha ke mujhe Yaali Bin Muslim aur Amr Bin Dinar ne Saeed se khabar di. Ye donon hazrat (Saeed Bin Jubair se apni riwayaton mein) ek doosre se kuch ziyada riwayat karte hain. Ibn Jurayj ne kaha mein ne ye hadees auron se bhi suni hai. Wo bhi Saeed Bin Jubair se naqal karte thay ke mujh se Ibn Abbas (Radi Allahu Anhuma) ne kaha, aur un se Ubayy Bin Kaab (Radi Allahu Anhu) ne kaha, unhon ne kaha ke mujh se Rasul Allah (Sallallahu Alaihi Wasallam) ne irshad farmaya ke phir wo donon (Musa aur Khidr Alaihima Salam) chale. To unhein ek gaon mein ek deewar mili jo girne hi wali thi. Saeed ne kaha Khidr (Alaihis Salam) ne apne hath se is tarah isharah kiya aur hath uthaya, wo deewar seedhi ho gayi. Yaali ne kaha mera khayal hai ke Saeed ne kaha, Khidr (Alaihis Salam) ne deewar ko apne hath se chhua, aur wo seedhi ho gayi, tab Musa (Alaihis Salam) bole ke agar aap chahte to is kaam ki mazdoori lay sakte thay. Saeed ne kaha ke (Musa Alaihis Salam ki murad ye thi ke) koi aisi cheez mazdoori mein (aap ko leni chahiye thi) jise hum kha sakte (kyunke basti walon ne un ko khana nahi khilaya tha)
.

Hum se Muhammed bin Ghurair Zohri ne bayan kiya, un se Ya’qoob bin Ibrahim ne, un se un ke baap (Ibrahim) ne, unhon ne Saleh se suna, unhon ne Ibn-e-Shihaab se, woh bayan karte hain ke unhein Ubaidullah bin Abdullah ne Ibne-e-Abbas Radhiallahu Anhuma ke waaste se khabar di ke woh aur Hurr bin Qais bin Hisn Fazaari Musa Alaihissalam ke saathi ke baare mein behas-o-takraar karne lage. Ibne-e-Abbas Radhiallahu Anhuma ne farmaaya ke woh Khazir Alaihissalam the. Phir un ke paas se Ubai bin Ka’b guzre to Abdullah bin Abbas Radhiallahu Anhuma ne unhein bulaaya aur kaha ke main aur mere yeh rafeeq Musa Alaihissalam ke us saathi ke baare mein behas kar rahe hain jis se unhon ne mulaqaat chaahi thi. Kya aap ne Rasoolullah Sallallahu Alaihi Wasallam se is ke baare mein kuch zikr suna hai. Unhon ne kaha, haan main ne Rasoolullah Sallallahu Alaihi Wasallam ko yeh farmaate huwe suna hai. Ek din Musa Bani Israel ki ek jama’at mein baithe huwe the ke itne mein ek shakhs aaya aur us ne aap se poocha kya aap jaante hain ke (duniya mein) koi aap se bhi badh kar aalim maujood hai? Musa Alaihissalam ne farmaaya nahi. Is par Allah Ta’ala ne Musa Alaih Islam ke paas Wahi bheji ke haan hamaara bandah Khazir hai (jis ka ilm tum se ziyada hai) Musa Alaihissalam ne Allah se daryaaft kiya ke Khazir Alaihissalam se milne ki kya soorat hai? Allah Ta’ala ne ek machli ko un se mulaqaat ki alamat qaraar diya aur un se keh diya ke jab tum us machli ko gum kar do to (waapas) laut jaao, tab Khazir se tumhaari mulaqaat hogi. Tab Musa (chale aur) darya mein machli ki alamat talaash karte rahe. Us waqt un ke saathi ne kaha jab hum paththar ke paas the, kya aap ne dekha tha, main us waqt machli ka kehna bhool gaya aur shaitaan hi ne mujhe us ka zikr bhula diya. Musa Alaihissalam ne kaha, usi maqam ki hamein talaash thi. Tab woh apne nishanaat-e-qadam par (pichle paaon) baatein karte huwe laute (wahaan) unhon ne Khazir Alaihissalam ko paaya. Phir un ka wahi qissa hai jo Allah ne apni kitaab Quran mein bayan kiya hai.

Hum se Ibrahim Bin Musa ne bayan kiya, kaha ke hum ko Hisham Bin Yusuf ne khabar di, unhein Ibn Juraij ne khabar di, kaha ke mujhe Ya'la Bin Muslim aur Amr Bin Dinar ne khabar di Saeed Bin Jubair se aur un mein ek doosre se zyada bayan karta hai, Ibn Juraij ne kaha mujh se ye hadees Ya'la aur Amr ke siwa auron ne bhi bayan ki, wo Saeed Bin Jubair se riwayat karte hain ke hum Ibn Abbas (Radi Allahu Anhuma) ki khidmat mein hazir thay. Unhon ne kaha ke mujh se Ubayy Bin Kaab (Radi Allahu Anhu) ne bayan kiya, unhon ne kaha ke Rasul Allah (Sallallahu Alaihi Wasallam) ne farmaya "Khizr se jo ja kar mile thay wo Musa Alaihissalam thay." Phir aakhir tak hadees bayan ki ke Khizr Alaihissalam ne Musa Alaihissalam se kaha kya mein aap ko pehle hi nahi bata chuka tha ke aap mere sath sabr nahi kar sakte (Musa Alaihissalam ki taraf se) pehla sawal to bhool kar hua tha, beech ka shart ke taur par aur teesra jaan boojh kar hua tha. Aap ne Khizr se kaha tha ke "Mein jis ko bhool gaya aap us mein mujh se moakhazah na kijiye aur na mera kaam mushkil banaiye." Dono ko ek larka mila jise Khizr Alaihissalam ne qatl kar diya wo aage barhe to unhein ek diwar mili jo girne wali thi lekin Khizr Alaihissalam ne ise durust kar diya. Ibn Abbas (Radi Allahu Anhuma) ne «Wara'ahum Malika» «Wara'ahum» ke bajaye «Amamahum Malika» parha hai
.

Hum se Imam Humaydi ne bayan kiya , kaha hum se Sufyan bin Uyaynah ne bayan kiya , kaha hum se Amr bin Dinar ne bayan kiya , kaha mujhko Saeed bin Jubayr ne khabar di , kaha ke main ne Ibn Abbas razi Allahu anhuma se poochha to unhon ne bayan kiya ke hamase Ubayy bin Kabb razi Allahu anhu ne bayan kiya , unhon ne Rasool Allah salla Allahu alaihi wasallam se suna , aayat «laa tu'aakhizhneee bimaa naseetu wa laa tur-hiqneee min amree usran» ke mutalliq ke pehli martaba aitraz Musa alaihissalam se bhool kar hua thu .