Hum se Muhammad Bin Muthanna ne bayan kiya, kaha ke hum se Ibrahim Bin Abi Adi ne bayan kiya, un se Abdullah Bin Aun ne, un se Shabi ne, unhon ne Numan Bin Bashir (Radi Allahu Anhu) se suna, unhon ne kaha ke mein ne Nabi Kareem (Sallallahu Alaihi Wasallam) se suna (doosri sanad Imam Bukhari Rahimahullah ne kaha) aur hum se Ali Bin Abdullah ne bayan kiya, kaha ke hum se Sufyan Bin Uyainah ne bayan kiya, un se Abu Farwah ne, un se Shabi ne, kaha ke mein ne Numan Bin Bashir (Radi Allahu Anhu) se suna, aur unhon ne Nabi Kareem (Sallallahu Alaihi Wasallam) se (teesri sanad) aur hum se Abdullah Bin Muhammad ne bayan kiya, kaha ke hum se Sufyan Bin Uyainah ne bayan kiya, un se Abu Farwah ne, unhon ne Shabi se suna, unhon ne Numan Bin Bashir (Radi Allahu Anhu) se suna aur unhon Nabi Kareem (Sallallahu Alaihi Wasallam) se (chauthi sanad) aur hum se Muhammad Bin Kathir ne bayan kiya, kaha ke hum ko Sufyan Thauri ne khabar di, unhein Abu Farwah ne, unhein Shabi ne aur un se se Numan Bin Bashir (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya halal bhi khula hua hai aur haram bhi zahir hai lekin in donon ke darmiyan kuch mushtaba cheezein hain. Pas jo shakhs in cheezon ko chore jin ke gunah hone ya na hone mein shubha hai wo in cheezon ko to zaroori hi chor de ga jin ka gunah hona zahir hai lekin jo shakhs shubha ki cheezon ke karne ki jur-at kare ga to qareeb hai ke wo in gunahon mein mubtala ho jaye jo bilkul wazay taur par gunah hain (logo yaad rakkho) gunah Allah Ta'ala ki charagah hai jo (janwar bhi) charagah ke ard-gird charay ga is ka charagah ke andar chala jana ghair-mumkin nahi
.

Hum se Abu Nu’aim ne bayan kiya, kaha hum se Zakariyya ne, unhon ne Amir se, kaha main ne No’maan bin Basheer Radhiallahu Anhuma se suna, woh kehte the main ne Nabi Kareem Sallallahu Alaihi Wasallam se suna Aap Sallallahu Alaihi Wasallam farmaate the halaal khula huwa hai aur haraam bhi khula huwa hai aur un dono ke darmiyaan baaz cheezein shuba ki hain jin ko bahut log nahi jaante (ke halaal hain ya haraam) phir jo koi shuba ki cheezon se bhi bach gaya us ne apne deen aur izzat ko bacha liya aur jo koi un shuba ki cheezon mein pad gaya us ki misaal us charwaahe ki hai jo (shaahi mehfooz) charagaah ke aas paas apne jaanwaron ko charaaye. Woh qareeb hai ke kabhi us charagaah ke andar ghus jaaye (aur shaahi mujrim qaraar paaye) sun lo har baadshaah ki ek charagaah hoti hai. Allah ki charagaah us ki zameen par haraam cheezein hain. (pas un se bacho aur) sun lo badan mein ek gosht ka tukda hai jab woh durust hoga saara badan durust hoga aur jahaan bigda saara badan bigad gaya. Sun lo woh tukda aadmi ka dil hai.