Hum se Saeed Bin Abi Maryam ne bayan kiya, kaha hum se Muhammad Bin Jafar ne bayan kiya, kaha ke mujh se Zaid Bin Aslam ne bayan kiya, un se Ayaz ne aur un se Abu Saeed (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya kya jab aurat haiza hoti hai to namaz aur roze nahi chor deti ? yehi is ke deen ka nuqsan hai
.

Hum se Sa’eed bin Abi Maryam ne bayan kiya, unhon ne kaha hum se Muhammed bin Ja’far ne bayan kiya, unhon ne kaha mujhe Zaid ne aur yeh Zaid Aslam ke bete hain, unhon ne ’Iyaaz bin Abdullah se, unhon ne Abu Sa’eed Khudri Radhiallahu Anhu se ke aap ne farmaaya ke Rasoolullah Sallallahu Alaihi Wasallam Eid-ul-Azha ya Eid-ul-Fitr mein eidgaah tashreef le gaye. Wahan Aap Sallallahu Alaihi Wasallam aurton ke paas se guzre aur farmaaya aye aurton ki jama’at! Sadqa karo, kiunki main ne jahannam mein ziyada tum hi ko dekha hai. Unhon ne kaha ya Rasoolallah! Aisa kiun? Aap Sallallahu Alaihi Wasallam ne farmaaya ke tum la’an ta’an bahut karti ho aur shauhar ki na-shukri karti ho, bawjood aql aur deen mein naaqis hone ke main ne tum se ziyada kisi ko bhi ek aqalmand aur tajurbekaar aadmi ko dewaana bana dene waala nahi dekha. Aurton ne arz ki ke hamaare deen aur hamaari aql mein nuqsaan kya hai ya Rasoolallah? Aap Sallallahu Alaihi Wasallam ne farmaaya kya aurat ki gawaahi mard ki gawaahi se nisf nahi hai? Unhon ne kaha, ji hai. Aap Sallallahu Alaihi Wasallam ne farmaaya bas yahi us ki aql ka nuqsaan hai. Phir Aap ne poocha kya aisa nahi hai ke jab aurat haaiza ho to na Namaz padh sakti hai na Roza rakh sakti hai, aurton ne kaha aisa hi hai. Aap Sallallahu Alaihi Wasallam ne farmaaya ke yahi us ke deen ka nuqsaan hai.

Hum se Ibn Abi Maryam ne bayan kiya, unhon ne kaha hum ko Muhammad Bin Jafar ne khabar di, unhon ne kaha ke mujhe Zaid ne khabar di, unhein Iyaz Bin Abdullah ne aur unhein Abu Saeed Khudri (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Kya aurat ki gawahi mard ki gawahi ke aadhe ke barabar nahi hai?" Hum ne arz kiya kyun nahi. Aap (Sallallahu Alaihi Wasallam) ne farmaya "Yahi to in ki aql ka nuqsan hai."
.