Hum se Abdullah Bin Yusuf ne bayan kiya, kaha ke hume Imam Malik ne khabar di, unhein Ibn Shihab Zuhri ne, unhein Saeed Bin Musayyab ne ke Abu Hurairah (Radi Allahu Anhu) farmaya karte thay agar mein Madinah mein haran charte hue dekhoon to unhein kabhi na chheroon kyunke Rasul Allah (Sallallahu Alaihi Wasallam) ne farmaya ke Madinah ki zameen donon pathrele maidanon ke beech mein Haram hai
.

Hum se Ismail Bin Abdullah ne bayan kiya, kaha ke mujh se mere bhai Abdul Hameed ne bayan kiya, un se Sulaiman Bin Bilal ne, un se Ubaidullah ne, un se Saeed Maqbari ne aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya Madinah ke donon pathrele kinaron mein jo zameen hai wo meri zaban par Haram thehrayi gayi. Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) Bano Haritha ke paas aaye aur farmaya Bano Haritha! mera khayal hai ke tum log Haram se bahar ho gaye ho, phir Aap (Sallallahu Alaihi Wasallam) ne murr kar dekha aur farmaya ke nahi balkay tum log Haram ke andar hi ho
.

Hum se Musa Bin Ismail ne bayan kiya, kaha ke hum se Wuhaib ne bayan kiya, kaha ke hum se Amr Bin Yahya ne bayan kiya, un se Abbad Bin Tamim Ansari ne aur un se Abdullah Bin Zaid (Radi Allahu Anhu) ne ke Nabi Kareem (Sallallahu Alaihi Wasallam) ne farmaya, Ibrahim (Alaihis Salam) ne Makkah ko haram qarar diya. Aur is ke liye dua farmayi. Mein bhi Madinah ko isi tarah haram qarar deta hoon jis tarah Ibrahim (Alaihis Salam) ne Makkah ko haram qarar diya tha. Aur is ke liye, is ke mudd aur saa (ghalla naap-ne ke do paimane) ki barkat ke liye is tarah dua karta hoon jisay Ibrahim (Alaihis Salam) ne Makkah ke liye dua ki thi
.