Hum se Abdullah Bin Yusuf ne bayan kiya, kaha ke hum ko Imam Malik ne khabar di, unhein Ibn Shihab ne aur un se Salim ne bayan kiya ke Abdul Malik Bin Marwan ne Hajjaj Bin Yusuf ko likha ke Haj ke ahkam mein Abdullah Bin Umar (Radi Allahu Anhuma) ke khilaf na kare. Salim ne kaha ke Abdullah Bin Umar (Radi Allahu Anhuma) Arafa ke din sooraj dhalte hi tashreef laye mein bhi un ke sath tha. Aap ne Hajjaj ke khaime ke paas buland awaz se pukara. Hajjaj bahar nikla is ke badan mein ek kusum mein rangi hui chadar thi. Is ne poocha Abu Abdul Rahman! Kya baat hai? Aap ne farmaya agar sunnat ke mutabiq amal chahte ho to jaldi uth kar chal khare ho jao. Is ne kaha kya isi waqt? Abdullah ne farmaya ke haan isi waqt. Hajjaj ne kaha ke phir thori si muhlat dijiye ke mein apne sar par pani daal loon yani ghusl kar loon phir nikalta hoon. Is ke baad Abdullah Bin Umar (Radi Allahu Anhuma) (sawari se) utar gaye aur jab Hajjaj bahar aaya to mere aur walid (Ibn Umar) ke darmiyan chalne laga to mein ne kaha ke agar sunnat par amal ka irada hai to khutba mein ikhtisar aur wuquf (Arafat) mein jaldi karna. Is baat par wo Abdullah Bin Umar (Radi Allahu Anhuma) ki taraf dekhne laga Abdullah Bin Umar (Radi Allahu Anhuma) ne kaha ke ye sach kehta hai
.

Hum se Abdullah Bin Yusuf Tinisi ne bayan kiya, kaha hum ko Imam Malik ne Hisham Bin Urwah se khabar di, un se un ke walid ne bayan kiya ke Usama Bin Zaid (Radi Allahu Anhuma) se kisi ne poocha (mein bhi wahin maujood tha) ke Hajjat-ul-Wida ke moqa par Arafat se Rasul Allah (Sallallahu Alaihi Wasallam) ke wapas hone ki chaal kya thi? Unhon ne jawab diya ke Aap (Sallallahu Alaihi Wasallam) paon utha kar chalte thay zara taiz, lekin jab jagah pate (hujoom na hota) to taiz chalte thay, Hisham ne kaha ke «Anaq» taiz chalna aur «Nass» «Anaq» se zyada taiz chalne ko kehte hain. «Fajwah» ke mani kushada jagah, is ki jama «Fajwat» aur «Fija» hai jaise Zakat mufrad «Zaka» is ki jama aur Surah Sad mein «Manas» ka jo lafz aaya hai is ke mani bhagna hai
.

Hum se Abdullah Bin Maslama ne bayan kiya, unhon ne kaha ke humein Imam Malik ne khabar di, unhein Ibn Shihab ne, unhein Salim Bin Abdullah ne ke Abdul Malik Bin Marwan (Khaleefa) ne Hajjaj ko likha ke Haj ke kaamon mein Abdullah Bin Umar (Radi Allahu Anhuma) ki iqtida kare. Jab Arafa ka din aaya to Abdullah Bin Umar (Radi Allahu Anhuma) aaye mein bhi aap ke sath tha, sooraj dhal chuka tha, aap ne Hajjaj ke dere ke paas aa kar buland awaz se kaha Hajjaj kahan hai? Hajjaj bahar nikla to Ibn Umar (Radi Allahu Anhuma) ne farmaya chal jaldi kar waqt ho gaya. Hajjaj ne kaha abhi se? Ibn Umar (Radi Allahu Anhuma) ne farmaya ke haan. Hajjaj bola ke phir thori muhlat de dijiye, mein abhi ghusl kar ke aata hoon. Phir Abdullah Bin Umar (Radi Allahu Anhuma) (apni sawari se) utar gaye. Hajjaj bahar nikla aur mere aur mere walid (Ibn Umar) ke beech mein chalne laga, mein ne is se kaha ke aaj agar sunnat par amal ki khwahish hai to khutba mukhtasar parh aur wuquf mein jaldi kar. Abdullah Bin Umar (Radi Allahu Anhuma) ne farmaya ke Salim sach kehta hai
.