Hum se Sulayman bin Harb ne byaan kiya ‘ kaha ke hum se Hammad bin Zayd ne byaan kiya ‘ un se Thabit ne ‘ un se Anas bin Malik razi Allahu anhu ne byaan kiya ke ek Yahudi larka (Abdul Quddus) Nabi Karim salla Allahu alaihi wasallam ki khidmat kiya karta tha , ek din woh bimar ho gaya . Aap salla Allahu alaihi wasallam is ka mizaj maloom karne ke liye tashreef laaye aur is ke sarhane baith gaye aur farmaya ke Musalman ho ja . Us ne apne baap ki taraf dekha , baap wahin maujood tha . Us ne kaha ke (kya muzaiqa hai) Abul Qasim salla Allahu alaihi wasallam jo kuch kehte hain maan le . Chunanche woh bacha Islam le aaya . Jab Nabi Karim salla Allahu alaihi wasallam bahar nikle to Aap salla Allahu alaihi wasallam ne farmaya ke shukr hai Allah Paak ka jis ne is bachay ko Jahannam se bacha liya .

Hum se Sulayman bin Harb ne bayan kiya, kaha hum se Hammad bin Zayd ne bayan kiya, in se Sabit ne aur in se Anas razi Allahu anhu ne ke ek Yahudi larka (Abdoos naami) Nabi Karim salla Allahu alaihi wasallam ki khidmat kiya karta tha woh beemar hua to Nabi Karim salla Allahu alaihi wasallam is ki mizaj-pursa ke liye tashreef laaye. Nabi Karim salla Allahu alaihi wasallam ne farmaya ke Islam qabool kar le chunanche us ne Islam qabool kar liya aur Saeed bin al-Musayyab ne bayan kiya apne walid se ke jab Abu Talib ki wafat ka waqt qareeb hua to Nabi Karim salla Allahu alaihi wasallam in ke paas mizaj-pursa ke liye tashreef le gaye.

Hum se Mualla bin Asad ne bayan kiya, kaha hum se Abdul Aziz bin Mukhtar ne bayan kiya, kaha hum se Khalid ne bayan kiya, in se Ikrimah ne aur in se Ibn Abbas razi Allahu anhuma ne ke Nabi Karim salla Allahu alaihi wasallam ek dehati ke paas is ki iyadat ke liye tashreef le gaye. Rawi ne bayan kiya ke jab Nabi Karim salla Allahu alaihi wasallam kisi ki iyadat ko tashreef le jaate to mareez se farmate «la ba-sa tahoorun in sha Allahu» ”koi fikr ki baat nahi. In sha Allah yeh marz gunahon se paak karne wala hai“ lekin is dehati ne Aap ke in mubarak kalma-t ke jawab mein kaha ke Aap kehte hain ke yeh paak karne wala hai hargiz nahi balkay yeh bukhar ek burhay par ghalib aa gaya hai aur usay qabr tak pahuncha ke rahe ga. Aap salla Allahu alaihi wasallam ne farmaya ke phir aisa hi ho ga.