Mujh ko Umm al-Mumineen Hafsa razi Allahu anha ne batlaya ke muazzin jab azaan deta aur Fajr ho jaati to Aap salla Allahu alaihi wasallam do rakatain parhte .

Hum se Abdullah bin Yusuf Tanisi ne byaan kiya , unhon ne kaha ke hamein Imam Malik rahmahu Allah ne Nafi se khabar di , un se Abdullah bin Umar razi Allahu anhuma ne byaan kiya ke Rasool Allah salla Allahu alaihi wasallam Zohar se pehle do rakat , is ke baad do rakat aur Maghrib ke baad do rakat apne ghar mein parhte aur Isha ke baad do rakatein parhte aur Juma ke baad do rakatein jab ghar wapas hote tab parha karte thay .

Hum se Bayan bin Amr ne byaan kiya , unhon ne kaha ke hum se Yahya bin Saeed Qattan ne byaan kiya , unhon ne kaha ke hum se Ibn Jurayj ne byaan kiya , un se Ata ne byaan kiya , un se Ubayd bin Umair ne , un se Aisha razi Allahu anha ne byaan kiya ke Nabi Karim salla Allahu alaihi wasallam kisi nafl namaaz ki Fajr ki do rakaton se zyada pabandi nahin karte thay .

Un se (Ibn Umar razi Allahu anhuma ne byaan kiya ke) meri behen Hafsa razi Allahu anha ne mujh se byaan kiya ke Nabi Karim salla Allahu alaihi wasallam Fajr hone ke baad do halki rakatain (sunnat Fajr) parhte aur yeh aisa waqt hota ke mein Nabi Karim salla Allahu alaihi wasallam ke paas nahin jaati thi . Ubaydullah ke saath is hadees ko Kaseer bin Farqad aur Ayub ne bhi Nafi se riwayat kiya aur Ibn Abi al-Zanad ne is hadees ko Musa bin Uqbah se , unhon ne Nafi se riwayat kiya . Is mein «fi baytihi» ke badal «fi ahlihi» hai .

Hum se Abdullah bin Yusuf Tinnisi ne bayan kiya , kaha ke humein Imam Malik ne Nafi se khabar di , unhon ne Abdullah bin Umar raziyallahu anhuma se , unhon ne kaha mujhe Umm ul Momineen Hafsa raziyallahu anha ne khabar di ke Rasool Allah salla Allahu alaihi wa sallam ki aadat thi ke jab moazzin subah ki azan subah sadiq ke tulu hone ke baad de chuka hota to aap salla Allahu alaihi wa sallam azan aur takbeer ke beech namaz qaim hone se pehle do halki si rakaten parhte .