Hum se Bishr bin Adam ne byaan kiya , kaha ke hum se Ali bin Mus-hir ne byaan kiya , kaha ke hamen Ubaidullah Umari ne khabar di , unhen Nafey ne aur Nafey ko Ibn Umar razi Allahu anhuma ne ke Nabi Karim salla Allahu alaihi wasallam aayat-e-sajdah ki tilawat agar hamari maujoodgi mein karte to Aap salla Allahu alaihi wasallam ke saath hum bhi sajdah karte thay . Is waqt itna azdhaam ho jata ke sajdah ke liye peshani rakhne ki jagah na milti jis par sajdah karne wala sajdah kar sake .

Hum se Musaddad bin Musarhad ne byaan kiya , kaha ke hum se Yahya bin Saeed Qattan ne byaan kiya , kaha ke hum se Ubaidullah Umari ne byaan kiya kaha ke hum se Nafey ne byaan kiya un se Ibn Umar razi Allahu anhuma ne kaha ke Nabi Karim salla Allahu alaihi wasallam hamari maujoodgi mein aayat-e-sajdah parhte aur sajdah karte to hum bhi Aap salla Allahu alaihi wasallam ke saath (hujoom ki wajah se) is tarah sajdah karte ke peshani rakhne ki jagah bhi na milti jis par sajdah karte .

Hum se Sadaqah bin Fadl ne byaan kiya , un se Yahya bin Saeed Qattan ne byaan kiya , un se Ubaidullah ne , un se Nafey ne , aur un se Ibn Umar razi Allahu anhuma ne ke Nabi Karim salla Allahu alaihi wasallam kisi aisi surah ki tilawat karte jis mein sajdah hota phir Aap salla Allahu alaihi wasallam sajdah karte aur hum bhi Aap salla Allahu alaihi wasallam ke saath sajdah karte yahan tak ke hum mein kisi ko apni peshani rakhne ki jagah na milti . (Maloom hua ke aisi halat mein sajdah na kiya jaye to koi harj nahi hai) «wallahu aalam» .

Hum se Ibn Muqatil ne bayan kiya, unhon ne kaha ke hum ko Abdullah ne khabar di, unhon ne kaha ke hum ko Auzai ne khabar di, unhon ne kaha ke mujh se Yahya Bin Abi Kathir ne bayan kiya, unhon ne kaha ke mujh se Abu Salma Bin Abdur Rahman ne bayan kiya, unhon ne kaha ke mujh se Abdullah Bin Amr Bin Aas (Radi Allahu Anhuma) ne bayan kiya, ke mujh se Rasul Allah (Sallallahu Alaihi Wasallam) ne farmaya, Abdullah! kya ye khabar sahi hai ke tum din mein to roza rakhte ho aur sari raat namaz parhte ho ? Mein ne arz ki sahi hai ya Rasul Allah (Sallallahu Alaihi Wasallam)! aap ne farmaya, ke aisa na kar, roza bhi rakh aur be-roza ke bhi reh. Namaz bhi parh aur so-uo bhi. Kyunke tumhare jism ka bhi tum par haqq hai tumhari aankhon ka bhi tum par haqq hai aur tumhari biwi ka bhi tum par haqq hai aur tum se mulaqat karne walon ka bhi tum par haqq hai bas yehi kafi hai ke har mahine mein teen din roza rakh liya karo, kyunke har naiki ka badla das guna mile ga aur is tarah ye sari umr ka roza ho jaye ga, lekin mein ne apne par sakhti chahi to mujh par sakhti kar di gayi. Mein ne arz ki, ya Rasul Allah! mein apne mein quwat pata hoon. Is par aap ne farmaya ke phir Allah ke Nabi Daud (Alaihis Salam) ka roza rakh aur is se aage na barh, mein ne poocha Allah ke Nabi Daud (Alaihis Salam) ka roza kya tha ? Aap (Sallallahu Alaihi Wasallam) ne farmaya, ek din roza rakhte aur ek din be-roza raha karte thay. Abdullah (Radi Allahu Anhu) baad mein jab zaeef ho gaye to kaha karte thay kash! mein Rasul Allah (Sallallahu Alaihi Wasallam) ki di hui rukh-sat maan leta
.