Hum se Abdullah bin Yusuf Tinnisi ne byaan kiya , unhon ne kaha ke hamen Imam Malik rahimahullah ne khabar di , unhen Hisham bin Urwah ne , unhen un ki biwi Fatimah bint Munzir ne , unhen Asma bint Abi Bakr razi Allahu anhuma ne , unhon ne kaha ke jab sooraj ko grahan laga to main Nabi Karim salla Allahu alaihi wasallam ki biwi Ayesha Siddiqa razi Allahu anha ke ghar aayi . Achanak log kharay huay namaaz parh rahe thay aur Ayesha razi Allahu anha bhi namaaz mein shareek thi main ne poocha ke logon ko baat kya pesh aayi ? Is par aap ne aasmaan ki taraf isharah kar ke Subhan Allah kaha . Phir main ne poocha kya koi nishani hai ? Is ka aap ne isharah se haan mein jawab diya . Unhon ne byaan kiya ke phir main bhi khari ho gayi . Lekin mujhe chakkar aa gaya is liye main apne sar par paani daalne lagi . Jab Rasool Allah salla Allahu alaihi wasallam namaaz se farigh huay to Allah Ta'ala ki hamd o sana ke baad farmaya ke woh cheezen jo ke main ne pehle nahi dekhi thin ab unhen main ne apni isi jagah se dekh liya . Jannat aur Dozakh tak main ne dekhi aur mujhe wahi ke zariye bataya gaya hai ke tum qabar mein Dajjal ke fitnah ki tarah ya (yeh kaha ke) Dajjal ke fitnah ke qareeb aik fitnah mein mubtala ho ge . Mujhe yaad nahi ke Asma razi Allahu anha ne kya kaha tha Aap ne farmaya ke tumhen laya jaye ga aur poocha jaye ga ke is shakhs (mujh salla Allahu alaihi wasallam) ke baare mein tum kya jaante ho . Momin ya yeh kaha ke yaqeen karne wala (mujhe yaad nahi ke in do baton mein se Asma razi Allahu anha ne kaun si baat kahi thi) to kahe ga yeh Muhammad salla Allahu alaihi wasallam hain Aap salla Allahu alaihi wasallam ne hamare saamne sahih raasta aur us ke dalail pesh kiye aur hum Aap salla Allahu alaihi wasallam par imaan laye thay aur Aap salla Allahu alaihi wasallam ki baat qabool ki aur Aap salla Allahu alaihi wasallam ka itba kiya tha . Is par us se kaha jaye ga ke tu mard saalih hai pas aaram se so jao hamen to pehle hi maloom tha ke tu imaan o yaqeen wala hai . Munafiq ya shak karne wala (mujhe maloom nahi ke Asma razi Allahu anha ne kya kaha tha) woh yeh kahe ga ke mujhe kuch maloom nahi main ne logon se aik baat suni thi wahi main ne bhi kahi (aage mujh ko kuch haqeeqat maloom nahi) .

Hum se Musa bin Ismail ne bayan kiya, un se Wuhaib ne, un se Hishaam ne Fatima ke waaste se naql kiya, woh Asma se riwayat karti hain ke main Aisha Radhiallahu Anha ke paas aayi, woh Namaz padh rahi thein, main ne kaha ke logon ka kya haal hai? To unhon ne aasman ki taraf ishaara kiya (yani suraj ko gahan laga hai) itne mein log (Namaz ke liye) khade ho gaye. Aisha Radhiallahu Anha ne kaha, Allah paak hai. Main ne kaha (kya yeh gahan) koi (khaas) nishaani hai? Unhon ne sar se ishaara kiya yani haan! Phir main (bhi Namaz ke liye) khadi ho gayi. Hatta ke mujhe ghash aane laga, to main apne sar par paani daalne lagi. Phir (Namaz ke baad) Rasoolullah Sallallahu Alaihi Wasallam ne Allah Ta’ala ki ta’reef aur us ki sifat bayan farmaayi, phir farmaaya, jo cheez mujhe pehle dikhlaayi nahi gayi thi aaj woh sab is jagah main ne dekh li, yahan tak ke jannat aur dozakh ko bhi dekh liya aur mujh par yeh Wahi ki gayi ke tum apni qabron mein aazmaaye jaaoge, «مِثْل» ya «قَرِيب» ka kaun sa lafz Asma ne farmaaya, main nahi jaanti, Fatima kehti hain (yani) fitna-e-Dajjaal ki tarah (aazmaaye jaaoge) kaha jaayega (qabr ke andar ke) tum is aadmi ke baare mein kya jaante ho? To jo sahib-e-imaan ya sahib-e-yaqeen hoga, kaun sa lafz farmaaya Asma Radhiallahu Anha ne, mujhe yaad nahi. Woh kahega woh Muhammed Allah ke Rasool Sallallahu Alaihi Wasallam hain, jo hamaare paas Allah ki hidaayat aur daleelen le kar aaye to hum ne un ko qabool kar liya aur un ki pairwi ki woh Muhammed Sallallahu Alaihi Wasallam hain. Teen baar (isi tarah kahega) phir (us se) keh diya jaayega ke aaraam se so jaa be-shak hum ne jaan liya ke tu Muhammed Sallallahu Alaihi Wasallam par yaqeen rakhta tha. Aur beher-haal munafiq ya shakki aadmi, main nahi jaanti ke in mein se kaun sa lafz Asma Radhiallahu Anha ne kaha. To woh (munafiq ya shakki aadmi) kahega ke jo logon ko main ne kehte suna main ne (bhi) wahi keh diya. (Baaqi main kuch nahi jaanta.)