Aur Sulaiman bin Surad sahaba ne azan ke dauran baat ki aur Hassan Basri ne kaha ke agar ek shakhs azan ya takbeer kehte hue hans de to koi harj nahi .

Hum se Musaddad bin Musarhad ne bayan kiya , kaha ke hum se Hammad bin Zaid ne Ayyub Sakhtiyani aur Abdul Hameed bin Dinar Sahib az-Ziyadi aur Aasim Ahwal se bayan kiya , unhon ne Abdullah bin Harith Basri se , unhon ne kaha ke Ibn Abbas raziyallahu anhuma ne ek din hum ko juma ka khutba diya . Barish ki wajah se is din achhi khasi keechad ho rahi thi . Moazzin jab hayya ala as-salat par pohancha to aap ne is se as-salat fi ar-rihal kehne ke liye farmaya ke log namaz apni qiyam gahon par parh len . Is par log ek doosre ko dekhne lage . Ibn Abbas raziyallahu anhuma ne kaha ke isi tarah mujh se jo afzal thay , unhon ne bhi kiya tha aur is mein shak nahi ke juma wajib hai .