Hum se Muhammad bin Bashar ne bayan kiya , kaha hum se Jafar bin Aun ne bayan kiya , kaha hum Abu al-Umais (Utbah bin Abdullah) ne bayan kiya , in se Aun bin Abi Juhaifah ne aur in se in ke walid ne bayan kiya ke Nabi Karim salla Allahu alaihi wasallam ne Salman Farsi aur Abu al-Darda razi Allahu anhuma ko bhai bhai bana diya . Ek martaba Salman , Abu al-Darda razi Allahu anhuma ki mulaqat ke liye tashreef laaye aur Umm al-Darda razi Allahu anha ko bari khasta halat mein dekha aur poochha kya haal hai ? Woh bolien tumhare bhai Abu al-Darda ko duniya se koi sarokaar nahi . Phir Abu al-Darda tashreef laaye to Salman razi Allahu anhu ne in ke samne khana pesh kiya . Unhon ne kaha ke Aap khaiye , main roze se hoon . Salman Farsi razi Allahu anhu bole ke main is waqt tak nahi khaoon ga . Jab tak Aap bhi na khayein . Chunanche Abu al-Darda ne bhi khaya raat hui to Abu al-Darda razi Allahu anhu namaz parhne ki tayyari karne lage . Salman ne kaha ke so jaiye , phir jab aakhir raat hui to Abu al-Darda ne kaha ab uthiye , bayan kiya ke phir donon ne namaz parhi . Is ke baad Salman razi Allahu anhu ne kaha ke bilashubha tumhare Rabb ka tum par haq hai aur tumhari jaan ka bhi tum par haq hai , tumhari biwi ka bhi tum par haq hai , pas saare haq-daron ke huqooq ada karo . Phir Nabi Karim salla Allahu alaihi wasallam ki khidmat mein hazir huay aur Aap se is ka zikr kiya to Nabi Karim salla Allahu alaihi wasallam ne farmaya ke Salman ne sach kaha hai . Abu Juhaifah ka naam Wahb al-Sawai hai , jise Wahb al-Khair bhi kehte hain .