Aur Ibn Abbas razi Allahu anhuma ne kaha ke «ad-darkul asfalu» se murad jahannum ka sab se nichla darja hai aur Surah al-Anaam mein «nafaqan» bamaani «saraban» yani surang murad hai .

Hum se Umar bin Hafs bin Ghiyas ne byaan kiya , kaha un se un ke baap ne byaan kiya , un se Aamash ne byaan kiya , kaha ke mujh se Ibrahim ne byaan kiya , un se Aswad ne byaan kiya ke hum Abdullah bin Masood razi Allahu anhu ke halqa e dars mein baithe huay thay ke Huzayfah razi Allahu anhu tashreef laye aur hamare paas kharay ho kar salam kiya . Phir kaha nifaq mein woh jama'at mubtala ho gayi jo tum se behtar thi . Is par Aswad bolay , Subhan Allah , Allah Ta'ala to farmata hai «innal munafiqeena fiddarkil asfali minannari» ke ”munafiq dozakh ke sab se nichle darje mein hon ge .“ Abdullah bin Masood razi Allahu anhu muskurane lage aur Huzayfah razi Allahu anhu masjid ke kone mein ja kar baith gaye . Is ke baad Abdullah bin Masood razi Allahu anhu uth gaye aur Aap ke shagird bhi idhar udhar chale gaye . Phir Huzayfah razi Allahu anhu ne mujh par kankari phenki (yani mujh ko bulaya) main hazir ho gaya to kaha ke mujhe Abdullah bin Masood razi Allahu anhu ki hansi par hairat hui haalan ke jo kuch main ne kaha tha usay woh khoob samajhte thay . Yaqeenan nifaq mein ek jama'at ko mubtala kiya gaya tha jo tum se behtar thi , is liye ke phir unhon ne tauba kar li aur Allah ne bhi un ki tauba qabool kar li .