Hum se Musaddad bin Musarhad ne byaan kiya , kaha hum se Yahya Qattan ne byaan kiya , un se Ismail bin Abi Khalid ne , un se Haris bin Shibl ne , un se Abu Amr Shaybani ne aur un se Zayd bin Arqam razi Allahu anhu ne byaan kiya ke pehle hum namaz parhte huay baat bhi kar liya karte thay , koi bhi shakhs apne doosre bhai se apni kisi zaroorat ke liye baat kar leta tha . Yahan tak ke yeh aayat nazil hui «hafizhu ala-ssalawati wassalatil wusta wa qoomu lillahi qaniteen» ”sab hi namazon ki pabindi rakho aur khaas taur par beech wali namaz ki aur Allah ke samne farman-bardaron ki tarah kharay hua karo .“ Is aayat ke zariye hamain namaz mein chup rehne ka hukm diya gaya .