Mujh se Muhammad bin Abi Bakr ne byaan kiya , unhon ne kaha hum se Fudayl bin Sulayman ne byaan kiya , unhon ne kaha hum se Musa bin Uqbah ne byaan kiya , unhon ne mujh ko Kurayb ne khabar di aur unhon ne Abdullah bin Abbas razi Allahu anhuma se byaan kiya ke (jo koi tamattu kare umrah kar ke ihram khol daale woh) jab tak hajj ka ihram na bandhe Bayt Allah ka nafal tawaf karta rahe . Jab hajj ka ihram bandhe aur Arafat jaane ko sawar ho to hajj ke baad jo qurbani ho sake woh kare , oont ho ya gaye ya bakri . In teenon mein se jo ho sake agar qurbani muyassar na ho to teen roze hajj ke dinon mein rakhe Arafa ke din se pehle agar aakhri roza Arafa ke din aa jaye tab bhi koi qabahat nahi . Shehar e Makkah se chal kar Arafat ko jaye wahan Asr ki namaz se raat ki tareeki hone tak thehre , phir Arafat se is waqt laute jab doosre log lautein aur sab logon ke saath raat Muzdalifa mein guzare aur Allah ki yaad , takbeer aur tehleel bahut karta rahe subah hone tak . Subah ko logon ke saath Muzdalifa se Mina ko laute jaise Allah ne farmaya «summa afeedoo min haysu afadan naasu wastaghfirullaha innallaha ghafoorur raheem» yani kankariyan maarne tak isi tarah Allah ki yaad aur takbeer o tehleel karte raho .