Aur Allah Ta'ala ka irshad "qatilu-llazina la yuminuna billahi wala bil yawmil akhiri wala yuharrimuna ma harramallahu wa-rasuluhu wala yadinuna din-al-haqqi min-allazina otu-l-kitaba hatta yutu-l-jizyata ay-yadin wa-hum saghiruna" "In logon se jung karo jo Allah par iman nahi laye aur na Aakhirat ke din par aur na in cheezon ko wo haram mante hain jinhein Allah aur us ke Rasul ne haram qarar diya hai aur na deen-e-haqq ko unhon ne qabool kiya (balki ulte wo log tum hi ko mitane aur Islam ko khatam karne ke liye jung par aamada ho gaye). In logon se jinhein kitab di gayi thi (maslan Yahud-o-Nasara) yahan tak (mudafiat karo) ke wo tumhare ghalba ki wajah se jizya dena qabool kar lein aur wo tumhare muqabala par dabb gaye hon." ("saghiruna" ke maane) "azilla" ke hain. Aur in ahadees ka zikr jin mein Yahud, Nasara, Majoos aur Ahl-e-Ajam se jizya lene ka bayan hua hai. Ibn Uyaina ne kaha, un se Ibn Abi Najeeh ne kaha ke mein ne Mujahid se pucha, is ki kya wajah hai ke Shaam ke Ahl-e-Kitab par char dinar (jizya) hai aur Yemen ke Ahl-e-Kitab par sirf ek dinar! To unhon ne kaha ke Shaam ke kafir zyada maldar hain
.

Hum se Ali Bin Abdullah Madini ne bayan kiya, unhon ne kaha hum se Sufyan Bin Uyaina ne bayan kiya, unhon ne kaha ke mein ne Amr Bin Dinar se suna, unhon ne bayan kiya ke mein Jabir Bin Zaid aur Amr Bin Aus ke sath baitha hua tha to in dono buzurgon se Bajala ne bayan kiya ke 70 Hijri mein jis saal Mus'ab Bin Zubair (Radi Allahu Anhu) ne Basra walon ke sath Hajj kiya tha. Zamzam ki seedhiyan ke paas unhon ne bayan kiya tha ke mein Ahnaf Bin Qais (Radi Allahu Anhu) ke chacha Juz' Bin Muawiyah ka katib tha. To wafat se ek saal pehle Umar Bin Khattab (Radi Allahu Anhu) ka ek maktub hamare paas aaya ke jis parsi ne apni muhram aurat ko biwi banaya ho to un ko juda kar do aur Umar (Radi Allahu Anhu) ne parsiyon se jizya nahi liya tha
.