Hum se Ishaq Bin Ibrahim ne bayan kiya, kaha ke mein ne Abu Usama se pucha, kya aap logon se Hisham Bin Urwah ne ye hadees apne walid se bayan ki hai ke un se Abdullah Bin Zubair (Radi Allahu Anhuma) ne kaha ke Jamal ki jung ke mauqa par jab Zubair (Radi Allahu Anhu) khade hue to mujhe bulaya mein un ke pehlu mein ja kar khada ho gaya, unhon ne kaha bete! Aaj ki ladai mein zalim mara jaye ga ya mazloom mein samajhta hoon ke aaj mein mazloom qatl kiya jaoon ga aur mujhe sab se zyada fikr apne qarzon ki hai. Kya tumhein bhi kuch andaza hai ke qarz ada karne ke baad hamara kuch mal bach sakega? Phir unhon ne kaha bete! Hamara mal farokht kar ke is se qarz ada kar dena. Is ke baad unhon ne ek tihayi ki mere liye aur is tihayi ke teesre hisse ki wasiyat mere bacchon ke liye ki, yaani Abdullah Bin Zubair (Radi Allahu Anhu) ke bacchon ke liye. Unhon ne farmaya tha ke is tihayi ke teen hisse kar lena aur agar qarz ki adayigi ke baad hamare amwal mein se kuch bach jaye to is ka ek tihayi tumhare bacchon ke liye hoga. Hisham rawi ne bayan kiya ke Abdullah (Radi Allahu Anhu) ke baaz larke Zubair (Radi Allahu Anhu) ke larkon ke ham-umar thay. Jaise Khubaib aur Abbad. Aur Zubair (Radi Allahu Anhu) ke is waqt nau larke aur nau larkiyan theen. Abdullah Bin Zubair ne bayan kiya ke phir Zubair (Radi Allahu Anhu) mujhe apne qarz ke silsile mein wasiyat karne lage aur farmane lage ke beta! Agar qarz ada karne se aajiz ho jao to mere Maalik-o-Maula se is mein madad chahna. Abdullah ne bayan kiya ke qasam Allah ki! Mein un ki baat na samajh saka, mein ne pucha ke baba aap ke Maula kaun hain? Unhon ne farmaya ke Allah Paak! Abdullah ne bayan kiya, qasam Allah ki! Qarz ada karne mein jo bhi dushwari samne aayi to mein ne isi tarah dua ki, ke Ae Zubair ke Maula! Un ki taraf se un ka qarz ada kara de aur adayigi ki surat paida ho jati thi. Chunanche jab Zubair (Radi Allahu Anhu) (isi mauqa par) shaheed ho gaye to unhon ne tarke mein dirham-o-dinar nahi chhode balki un ka tarka kuch to arazi ki surat mein tha aur isi mein Ghaba ki zameen bhi shamil thi. Gyarah makanat Madinah mein thay, do makan Basra mein thay, ek makan Kufa mein tha aur ek Misr mein tha. Abdullah ne bayan kiya ke un par jo itna sara qarz ho gaya tha is ki surat ye hui thi ke jab un ke paas koi shakhs apna mal le kar amanat rakhne aata to aap ise kehte ke nahi albatta is surat mein rakh sakta hoon ke ye mere zimme ba-taur qarz rahe. Kyunke mujhe is ke zaya ho jane ka bhi khauf hai. Zubair (Radi Allahu Anhu) kisi ilaqe ke ameer kabhi nahi bane thay. Na wo khiraj wasool karne par kabhi muqarrar hue aur na koi doosra ohda unhon ne qabool kiya, albatta unhon ne Rasul Allah (Sallallahu Alaihi Wasallam) ke sath aur Abu Bakr, Umar aur Usman (Radi Allahu Anhum) ke sath Jihadon mein shirkat ki thi. Abdullah Bin Zubair (Radi Allahu Anhu) ne kaha ke jab mein ne is raqam ka hisab kiya jo un par qarz thi to is ki tadaad baees lakh thi. Bayan kiya ke phir Hakim Bin Hizam (Radi Allahu Anhu) Abdullah Bin Zubair (Radi Allahu Anhu) se mile to daryaft farmaya, bete! Mere (deeni) bhai par kitna qarz reh gaya hai? Abdullah (Radi Allahu Anhu) ne chhupana chaha aur keh diya ke ek lakh, is par Hakim (Radi Allahu Anhu) ne kaha: Qasam Allah ki! Mein to nahi samajhta ke tumhare paas maujood sarmaye se ye qarz ada ho sakega. Abdullah ne ab kaha: Ke qarz ki tadaad baees lakh hui phir aap ki kya raye hogi? Unhon ne farmaya: Phir to ye qarz tumhari bardasht se bhi bahar hai. Khair agar koi dushwari pesh aaye to mujh se kehna, Abdullah ne bayan kiya ke Hazrat Zubair (Radi Allahu Anhu) ne Ghaba ki jayidad ek lakh sattar hazar mein khareedi thi lekin Abdullah ne wo solah lakh mein bechi. Phir unhon ne elan kiya ke Hazrat Zubair (Radi Allahu Anhu) par jis ka qarz ho wo Ghaba mein aa kar hum se mil le, chunanche Abdullah Bin Jafar Bin Abi Talib (Radi Allahu Anhu) aaye, un ka Zubair par char lakh rupaiya chahiye tha. Unhon ne to yahi peshkash ki ke agar tum chaho to mein ye qarz chhod sakta hoon, lekin Abdullah ne kaha ke nahi phir unhon ne kaha ke agar tum chaho to mein sare qarz ki adayigi ke baad le loon ga. Abdullah (Radi Allahu Anhu) ne is par bhi yahi kaha ke takheer ki bhi koi zaroorat nahi. Aakhir unhon ne kaha ke phir is zameen mein mere hisse ka qata muqarrar kar do. Abdullah (Radi Allahu Anhu) ne kaha ke aap apne qarz mein yahan se yahan tak le lijiye
. (Rawi ne) bayan kiya ke Zubair (Radi Allahu Anhu) ki jayidad aur makanat waghera bech kar un ka qarz ada kar diya gaya. Aur sare qarz ki adayigi ho gayi. Ghaba ki jayidad mein saadhe char hisse abhi bik nahi sake thay. Is liye Abdullah (Radi Allahu Anhu) Muawiyah (Radi Allahu Anhu) ke yahan (Shaam) tashreef le gaye, wahan Amr Bin Usman, Munzir Bin Zubair aur Ibn Zama bhi maujood thay. Muawiyah (Radi Allahu Anhu) ne un se daryaft kiya ke Ghaba ki jayidad ki qemat kitni tay hui, unhon ne bataya ke har hisse ki qemat ek lakh tay payi thi. Muawiyah (Radi Allahu Anhu) ne daryaft kiya ke ab baqi kitne hisse reh gaye hain? Unhon ne bataya ke saadhe char hisse, is par Munzir Bin Zubair ne kaha ke ek hisse ek lakh mein le leta hoon, Amr-o-Usman ne kaha ke ek hisse ek lakh mein le leta hoon, Ibn Zama ne kaha ke ek hisse ek lakh mein le leta hoon, is ke baad Muawiyah (Radi Allahu Anhu) ne pucha ke ab kitne hisse baqi bache hain? Unhon ne kaha ke dedh hisse! Muawiyah (Radi Allahu Anhu) ne kaha ke phir ise mein dedh lakh mein le leta hoon, bayan kiya ke Abdullah Bin Jafar (Radi Allahu Anhu) ne apna hisse baad mein Muawiyah (Radi Allahu Anhu) ko che lakh mein bech diya. Phir jab Abdullah Bin Zubair (Radi Allahu Anhu) qarz ki adayigi kar chuke to Zubair (Radi Allahu Anhu) ki aulad ne kaha ke ab hamari mirath taqseem kar dijiye, lekin Abdullah (Radi Allahu Anhu) ne farmaya ke abhi tumhari mirath is waqt tak taqseem nahi kar sakta jab tak char saal tak ayyam-e-Hajj mein elan na kara loon ke jis shakhs ka bhi Zubair (Radi Allahu Anhu) par qarz ho wo hamare paas aaye aur apna qarz le jaye, rawi ne bayan kiya ke Abdullah (Radi Allahu Anhu) ne ab har saal ayyam-e-Hajj mein is ka elan karana shuru kiya aur jab char saal guzar gaye, to Abdullah ne un ki mirath taqseem ki
. Rawi ne bayan kiya ke Zubair (Radi Allahu Anhu) ki char biwiyan theen aur Abdullah ne (wasiyat ke mutabiq) tihayi hisse bachi hui raqam mein se nikal liya tha, phir bhi har biwi ke hisse mein barah barah lakh ki raqam aayi, aur kul jayidad Hazrat Zubair (Radi Allahu Anhu) ki paanch karod do lakh hui
.