Hum se Saeed Bin Abi Maryam ne bayan kiya, un se Lais ne bayan kiya, kaha ke mujh se Aqeel ne bayan kiya Ibn Shihab se, un se Urwah ne zikar kiya ke Miswar Bin Makhrama (Radi Allahu Anhu) aur Marwan Bin Hakam ne unhein khabar di ke jab qabila Hawazin ka wafad Nabi Kareem (Sallallahu Alaihi Wasallam) ki khidmat mein hazir hua to Aap (Sallallahu Alaihi Wasallam) ne logon ko khitab farmaya aur Allah ki shan ke mutabiq sana ke baad aap ne farmaya: Amma ba'du! ye tumhare bhai tauba kar ke hamare paas aaye hain aur mein yahi behtar samajhta hoon ke un ke qaidi unhein wapas kar diye jayein. Ab jo shaks apni khushi se (qaidiyou ko) wapas karna chahe wo wapas kar de aur jo ye chahe ke unhein un ka hissa mile (to wo bhi wapas kar de) aur hamein Allah Ta'ala (is ke baad) sab se pehli jo ghanimat de ga, is mein se hum ise muawaza de dein ge. Logon ne kaha hum apni khushi se (un ke qaidi wapas kar ke) Aap ka irshad tasleem karte hain
.