Hum se Amr Bin Ali Fallas ne bayan kiya, kaha ke hum se Abu Asim ne bayan kiya, un se Usman ne jo Aswad ke bete hain, kaha ke mujhe Suleman Bin Abi Muslim ne khabar di, unhon ne kaha ke mein ne Abu Al-Minhal se bai-sarf naqd ke bare mein poocha to unhon ne kaha ke mein ne aur mere ek shareek ne koi cheez (sone aur chandi ki) khareedi naqd par bhi aur udhar par bhi. Phir hamare yahan Bara Bin Azib (Radi Allahu Anhu) aaye to hum ne un se is ke bare mein poocha. Unhon ne kaha ke mein ne aur mere shareek Zaid Bin Arqam (Radi Allahu Anhu) ne bhi ye bai ki thi aur hum ne is ke mutalliq Rasul Allah (Sallallahu Alaihi Wasallam) se poocha tha to Aap (Sallallahu Alaihi Wasallam) ne farmaya tha ke jo naqd ho wo le lo aur jo udhar ho ise chor do
.